సినిమా రంగంలో ప్రతిభ, అందం ఉన్నప్పటికీ కొంతమంది నటీమణులకు ఆశించిన స్థాయిలో గుర్తింపు, అవకాశాలు దక్కడం లేదు. అలాంటి వారిలో నటి రెజీనా కాసాండ్రా ఒకరు. దాదాపు రెండు దశాబ్దాలుగా తెలుగు, తమిళ చిత్రాల్లో నటిస్తూ ప్రేక్షకులను అలరిస్తున్న ఈ అందాల భామ.. ఇప్పటికీ విభిన్నమైన పాత్రలతో తనకంటూ ప్రత్యేక గుర్తింపు తెచ్చుకునేందుకు ప్రయత్నిస్తోంది. తాజాగా బాలీవుడ్‌లో తనకు ఎదురైన అనుభవంపై ఆమె చేసిన వ్యాఖ్యలు సినీ వర్గాల్లో చర్చనీయాంశంగా మారాయి.
టాలీవుడ్‌లో యువ హీరోల నుంచి సీనియర్ నటుల వరకు పలువురితో కలిసి నటించిన రెజీనా.. హీరోయిన్‌గా మాత్రమే కాకుండా ప్రత్యేక పాటల్లోనూ సందడి చేసింది. ఇప్పుడు నటనకు ప్రాధాన్యమున్న విభిన్న పాత్రలను ఎంచుకుంటూ ముందుకు సాగుతోంది. తాజాగా తమిళంలో నయనతార ప్రధాన పాత్రలో నటిస్తున్న ‘మహాశక్తి’ సినిమాలో ప్రతినాయక ఛాయలున్న పాత్రలో కనిపించనుంది. ఇప్పటికే విడుదలైన ట్రైలర్ ప్రేక్షకుల్లో ఆసక్తిని పెంచింది.
ఇదిలా ఉంటే, బాలీవుడ్ ప్రముఖ నిర్మాణ సంస్థ ధర్మ ప్రొడక్షన్స్‌పై రెజీనా చేసిన వ్యాఖ్యలు ఇప్పుడు హాట్ టాపిక్‌గా మారాయి. అక్షయ్ కుమార్ ప్రధాన పాత్రలో నటించిన ‘కేసరి చాప్టర్ 2: ది అన్‌టోల్డ్ స్టోరీ ఆఫ్ జలియన్‌వాలా బాగ్’ సినిమాలో తాను హీరో భార్య పాత్ర పోషించినట్లు రెజీనా వెల్లడించింది. కథలో తన పాత్రకు ప్రాధాన్యం ఉన్నప్పటికీ, సినిమా ప్రమోషన్ కార్యక్రమాల్లో తనను పూర్తిగా పక్కన పెట్టారని ఆమె ఆవేదన వ్యక్తం చేసింది.
సినిమా ప్రమోషన్ల సమయంలో ఎలాంటి కారణం చెప్పకుండా తన పేరును తొలగించారని రెజీనా తెలిపింది. అంతేకాకుండా, అక్షయ్ కుమార్‌తో కలిసి తాను నటించిన ప్రత్యేక పాటను విడుదల చేసినప్పటికీ, సోషల్ మీడియా పోస్టుల్లో తనకు తగిన గుర్తింపు ఇవ్వలేదని పేర్కొంది. తనను ట్యాగ్ చేయకపోవడం, పేరు ప్రస్తావించకపోవడం వెనుక కారణమేంటని ప్రశ్నించింది.
ఈ సందర్భంగా దక్షిణాది నటీనటుల పట్ల బాలీవుడ్‌లో వివక్ష చూపిస్తున్నారా అనే సందేహాన్ని కూడా రెజీనా వ్యక్తం చేసింది. ఉత్తరాది హీరోయిన్లు తమ అభిప్రాయాలను బహిరంగంగా వెల్లడిస్తే ప్రొఫెషనల్‌గా అభివర్ణిస్తారని, అదే దక్షిణాది నటీనటులు తమ అభిప్రాయాలను చెబితే పొగరుబోతులనే ముద్ర వేస్తారని వ్యాఖ్యానించింది.
సౌత్ నటీనటులను తక్కువగా చూడటం, వారి ప్రతిభకు తగిన గుర్తింపు ఇవ్వకపోవడం సరైన పద్ధతి కాదని రెజీనా అభిప్రాయపడింది. ఆమె చేసిన ఈ వ్యాఖ్యలు ప్రస్తుతం సోషల్ మీడియాలో వైరల్ అవుతున్నాయి. బాలీవుడ్‌లో ప్రాంతీయ వివక్ష ఉందా? నటీనటుల విషయంలో సమానమైన గుర్తింపు లభిస్తోందా? అనే చర్చకు ఈ వ్యాఖ్యలు మరోసారి తెరలేపాయి.