నర్సంపేట గ్రామీణం: మధ్యప్రదేశ్‌లోని జబల్‌పూర్‌లో బీటెక్‌ విద్యార్థిని ఆత్మహత్య చేసుకున్న ఘటన తీవ్ర విషాదాన్ని నింపింది. ప్రేమ పేరుతో ఓ యువకుడు మోసం చేసి వేధింపులకు గురిచేయడం వల్లే తమ కుమార్తె ప్రాణాలు తీసుకుందని కుటుంబ సభ్యులు ఆరోపించారు. ఈ నేపథ్యంలో బుధవారం విద్యార్థిని మృతదేహంతో ఆమె కుటుంబ సభ్యులు, బంధువులు ఆందోళనకు దిగారు.
నర్సంపేట మండలం చంద్రయ్యపల్లి పంచాయతీ పరిధిలోని బుచ్చినాయక్‌తండాకు చెందిన వాంకుడోతు కమలమ్మ, సమ్మయ్య దంపతుల కుమార్తె వైష్ణవి (20) జబల్‌పూర్‌లోని ఓ కళాశాలలో బీటెక్‌ మూడో సంవత్సరం చదువుతోంది. ఈ నెల 2న కళాశాల హాస్టల్‌లోని తన గదిలో ఉరివేసుకుని ఆత్మహత్యకు పాల్పడింది.
ప్రేమ పేరుతో వేధింపులు.. యువకుడిపై ఆరోపణలు
వరంగల్‌ జిల్లా చెన్నారావుపేట మండలానికి చెందిన ఓ యువకుడు ప్రేమ పేరుతో వైష్ణవిని మోసం చేయడంతో పాటు వేధింపులకు గురిచేశాడని కుటుంబ సభ్యులు ఆరోపిస్తున్నారు. తన కుమార్తె ఆత్మహత్యకు సదరు యువకుడే కారణమని పేర్కొంటూ తండ్రి సమ్మయ్య అక్కడి పోలీసులకు ఫిర్యాదు చేశారు.
మృతదేహంతో యువకుడి ఇంటి వద్దకు వెళ్లేందుకు యత్నం
తమ కుమార్తె మృతికి కారణమైన యువకుడిపై చర్యలు తీసుకోవాలని డిమాండ్‌ చేస్తూ కుటుంబ సభ్యులు, బంధువులు మృతదేహంతో అతడి ఇంటి వద్దకు వెళ్లేందుకు ప్రయత్నించారు. అయితే చెన్నారావుపేటలో పోలీసులు వారిని అడ్డుకున్నారు. దీంతో వారు రోడ్డుపై బైఠాయించి నిరసన తెలిపారు.
సమాచారం అందుకున్న నెక్కొండ సీఐ ఫణీందర్‌, ఎస్సైలు శ్రావణ్‌కుమార్‌, గోవర్ధన్‌ అక్కడికి చేరుకుని ఆందోళనకారులతో మాట్లాడారు. పరిస్థితిని అదుపులోకి తీసుకురావడానికి ప్రయత్నించారు.