మెదక్, నవంబర్ 4: పండించిన ధాన్యాన్ని విక్రయించుకునేందుకు పొలానికి వెళ్తున్న ఓ రైతు రోడ్డు ప్రమాదంలో ప్రాణాలు కోల్పోయాడు. రోడ్డు దాటుతున్న సమయంలో వెనుక నుంచి వేగంగా వచ్చిన గుర్తుతెలియని కారు ఢీకొట్టడంతో ఈ విషాద ఘటన చోటుచేసుకుంది. మెదక్ జిల్లా హవేలి ఘనపూర్‌ మండలం ఔరంగాబాద్‌కు చెందిన తిరుపతి కిషన్‌ (65) ఈ ప్రమాదంలో మృతిచెందారు.
తిరుపతి కిషన్‌ తన పొలంలో వరి కోతలు పూర్తి చేసి ధాన్యాన్ని విక్రయించేందుకు సిద్ధం చేసుకున్నారు. అయితే గ్రామ పరిసరాల్లో ప్రభుత్వం ఏర్పాటు చేసిన ఐకేపీ ధాన్యం కొనుగోలు కేంద్రం లేకపోవడంతో ప్రైవేటు వ్యాపారుల ద్వారా ధాన్యాన్ని అమ్ముకోవాలని నిర్ణయించుకున్నారు. ఈ క్రమంలో నవంబర్ 3న రాత్రి 10.45 గంటల సమయంలో పొలం వద్దకు వెళ్లేందుకు ఇంటి నుంచి బయలుదేరారు.
ఔరంగాబాద్‌ గేట్‌ వద్ద ఉన్న పంచముఖి హనుమాన్‌ ఆలయం సమీపంలో రోడ్డు దాటుతుండగా వెనుక నుంచి వేగంగా వచ్చిన ఓ కారు ఆయనను బలంగా ఢీకొట్టింది. ప్రమాదం జరిగిన వెంటనే కారు ఆపకుండా డ్రైవర్‌ అక్కడి నుంచి పరారయ్యాడు. తీవ్రంగా గాయపడిన కిషన్‌ను స్థానికులు అంబులెన్స్‌లో ప్రభుత్వ ఆసుపత్రికి తరలించారు. అయితే చికిత్స పొందుతూ ఆయన ప్రాణాలు కోల్పోయారు.
మరోవైపు ప్రభుత్వ ఆసుపత్రిలో విధుల్లో ఉండాల్సిన డ్యూటీ వైద్యుడు అందుబాటులో లేరని, కనీసం విద్యుత్‌ సదుపాయం కూడా లేక వైద్య సేవలకు ఆటంకం కలిగిందని మృతుడి కుటుంబ సభ్యులు, స్థానికులు ఆరోపిస్తున్నారు. సకాలంలో వైద్యం అందితే కిషన్‌ ప్రాణాలు దక్కేవని వారు ఆవేదన వ్యక్తం చేస్తున్నారు. ఈ ఘటనతో ఆయన కుటుంబంలో తీవ్ర విషాదం నెలకొంది. మృతుడికి భార్య, ముగ్గురు కుమారులు ఉన్నారు.
ప్రమాదానికి కారణమైన కారును సీసీటీవీ ఫుటేజీల ఆధారంగా గుర్తించి, పరారీలో ఉన్న డ్రైవర్‌పై కఠిన చర్యలు తీసుకోవాలని కుటుంబ సభ్యులు కోరుతున్నారు. అలాగే ప్రభుత్వ ఆసుపత్రిలో వైద్యుడు అందుబాటులో లేకపోవడం, విద్యుత్‌ సదుపాయం లేమిపై ఉన్నతాధికారులు విచారణ జరపాలని డిమాండ్‌ చేస్తున్నారు.
పండించిన పంటను అమ్ముకునేందుకు వెళ్లిన రైతు ఇలా రోడ్డు ప్రమాదంలో మృతిచెందడం స్థానికంగా కలకలం రేపింది. మృతుడి కుటుంబాన్ని ప్రభుత్వం ఆర్థికంగా ఆదుకోవాలని, ఔరంగాబాద్‌తో పాటు పరిసర గ్రామాల రైతుల ఇబ్బందులను దృష్టిలో ఉంచుకుని ఐకేపీ ధాన్యం కొనుగోలు కేంద్రాన్ని ఏర్పాటు చేయాలని గ్రామస్థులు విజ్ఞప్తి చేస్తున్నారు.