Hyderabad Water Crisis: హైదరాబాద్ నగరంలో తాగునీటి వృథాను అరికట్టేందుకు హైదరాబాద్ మెట్రోపాలిటన్ వాటర్ సప్లై అండ్ సీవరేజ్ బోర్డు (HMWSSB) ప్రత్యేక కార్యక్రమాన్ని ప్రారంభించింది. ఈ ప్రచారంలో భాగంగా నీటి దుర్వినియోగాన్ని గుర్తించి, అధికారులకు సమాచారం అందించేందుకు సామాన్య ప్రజలను సైతం భాగస్వాములుగా చేస్తోంది. ఇందుకోసం ప్రవేశపెట్టిన PAANI మొబైల్ యాప్‌కు నగరవాసుల నుంచి మంచి స్పందన లభిస్తోంది. ఇప్పటికే 437 మంది స్వచ్ఛందంగా వాటర్ వారియర్లుగా నమోదు చేసుకుని నీటి సంరక్షణ కార్యక్రమంలో భాగమయ్యారు.
హైదరాబాద్‌లో విలువైన తాగునీరు వృథా కాకుండా నియంత్రించడమే లక్ష్యంగా జలమండలి ఈ కార్యక్రమాన్ని చేపట్టింది. నీటి పొదుపు బాధ్యత ప్రతి ఒక్కరిలో ఉండాలనే ఉద్దేశంతో PAANI మొబైల్ యాప్‌ను అందుబాటులోకి తీసుకొచ్చింది. ఈ యాప్ ద్వారా ఎవరైనా వాటర్ వారియర్‌గా నమోదు చేసుకుని తమ పరిసర ప్రాంతాల్లో జరుగుతున్న నీటి దుర్వినియోగాన్ని అధికారుల దృష్టికి తీసుకెళ్లవచ్చు.
వాటర్ వారియర్లుగా నమోదు చేసుకున్న వారు గూగుల్ ప్లే స్టోర్ నుంచి PAANI యాప్‌ను డౌన్‌లోడ్ చేసుకోవాలి. అనంతరం తమ పరిసరాల్లో నీటి వృథాకు సంబంధించిన ఫొటోలు, వివరాలను యాప్‌లో అప్‌లోడ్ చేయవచ్చు. ముఖ్యంగా నల్లా నీటితో కార్లు, ఇతర వాహనాలను కడగడం, హోస్‌పైపులతో ఇళ్ల ముందు ఫ్లోర్లు శుభ్రం చేయడం, ఓవర్‌హెడ్ ట్యాంకులు నిండి నీరు రోడ్లపై ప్రవహించడం, తాగునీటి పైప్‌లైన్లలో లీకేజీలు వంటి సమస్యలను ఫిర్యాదు చేయవచ్చు.
ఫిర్యాదుదారుల వివరాలు గోప్యం.. ఉల్లంఘనలకు కఠిన చర్యలు!
PAANI యాప్ ద్వారా వాటర్ వారియర్లు పంపించే ఫిర్యాదులను జలమండలి అధికారులు పరిశీలిస్తారు. క్షేత్రస్థాయి ఇంజినీరింగ్ సిబ్బంది సంబంధిత ప్రాంతాల్లో తనిఖీలు నిర్వహిస్తారు. నీటి దుర్వినియోగం జరుగుతున్నట్లు నిర్ధారణ అయితే బాధ్యులకు నోటీసులు జారీ చేస్తారు. ఉల్లంఘన తీవ్రతను బట్టి నిబంధనల ప్రకారం చట్టపరమైన చర్యలు కూడా తీసుకుంటారు. అయితే ఫిర్యాదు చేసిన వారి వ్యక్తిగత వివరాలను అత్యంత గోప్యంగా ఉంచుతామని జలమండలి హామీ ఇచ్చింది.
ఎల్‌నినో ప్రభావంపై ఆందోళన.. ప్రతి ఇంట్లో 20 శాతం నీటి పొదుపు!
మరోవైపు రాబోయే రోజుల్లో ఎల్‌నినో ప్రభావంతో వాతావరణ పరిస్థితుల్లో మార్పులు వచ్చే అవకాశం ఉందన్న అంచనాల నేపథ్యంలో జలమండలి నీటి సంరక్షణపై ప్రత్యేక దృష్టి పెట్టింది. భవిష్యత్తులో నీటి కొరత సమస్యలు తలెత్తకుండా ముందస్తు జాగ్రత్తలు తీసుకోవాలని నగరవాసులకు విజ్ఞప్తి చేసింది.
ప్రతి కుటుంబం తమ రోజువారీ నీటి వినియోగంలో కనీసం 20 శాతం తగ్గించాలని అధికారులు సూచించారు. ఇళ్లలో నల్లాలు, పైపుల నుంచి నీరు లీక్ అవుతుంటే వెంటనే మరమ్మతులు చేయించాలని, తాగునీటిని అనవసర అవసరాలకు వినియోగించవద్దని కోరారు.
వాటర్ వారియర్లుగా నమోదు చేసుకోండి.. నీటి సంరక్షణలో భాగస్వాములు కండి!
హైదరాబాద్‌లోని కాలనీలు, అపార్ట్‌మెంట్లు, గేటెడ్ కమ్యూనిటీల నుంచి మరింత మంది స్వచ్ఛందంగా ముందుకు వచ్చి వాటర్ వారియర్లుగా నమోదు చేసుకోవాలని జలమండలి విజ్ఞప్తి చేసింది. ఇందుకోసం అధికారిక వెబ్‌సైట్‌లో రిజిస్ట్రేషన్ సదుపాయాన్ని అందుబాటులో ఉంచింది.
ప్రజల భాగస్వామ్యంతోనే నీటి వృథాను సమర్థంగా అరికట్టవచ్చని అధికారులు భావిస్తున్నారు. నీటి సంరక్షణను నగరవ్యాప్త ప్రజా ఉద్యమంగా మార్చడం, ప్రతి పౌరుడిలో బాధ్యతను పెంపొందించడం ఈ కార్యక్రమం ప్రధాన లక్ష్యమని జలమండలి పేర్కొంది.