హైదరాబాద్: కేంద్ర హోంమంత్రి అమిత్ షా హైదరాబాద్ పర్యటన నేపథ్యంలో తెలంగాణకు కేంద్ర ప్రభుత్వం చేసిన అభివృద్ధి, రాష్ట్రానికి ఇచ్చిన హామీల అమలుపై టీపీసీసీ అధ్యక్షుడు మహేష్ కుమార్ గౌడ్ ప్రశ్నలు సంధించారు. కేంద్రంలో పదేళ్లకు పైగా అధికారంలో ఉన్న బీజేపీ ప్రభుత్వం తెలంగాణకు ఇచ్చిన హామీలను నెరవేర్చడంలో విఫలమైందని ఆయన విమర్శించారు. రాష్ట్రానికి రావాల్సిన నిధులు, పరిశ్రమలు, ఉద్యోగాలు, రైతుల సంక్షేమంపై స్పష్టమైన సమాధానం చెప్పాలని డిమాండ్ చేశారు.
విభజన హామీల అమలుపై ప్రశ్నలు
తెలంగాణ విభజన చట్టంలో పేర్కొన్న హామీలను కేంద్రం ఎంతవరకు అమలు చేసిందని మహేష్ కుమార్ గౌడ్ ప్రశ్నించారు. రాష్ట్రానికి రావాల్సిన నిధుల్లో ఎన్ని విడుదల చేశారో వెల్లడించాలని కోరారు.
కాజీపేట రైల్వే కోచ్ ఫ్యాక్టరీ, బయ్యారం ఉక్కు పరిశ్రమ ఏర్పాటు అంశాలు ఏమయ్యాయని నిలదీశారు. తెలంగాణలోని సాగునీటి ప్రాజెక్టులకు జాతీయ హోదా కల్పించే విషయంలో కేంద్ర ప్రభుత్వ వైఖరిని స్పష్టం చేయాలని డిమాండ్ చేశారు.
పన్నుల వాటా, కేంద్ర గ్రాంట్ల కేటాయింపుల్లో తెలంగాణకు అన్యాయం జరుగుతోందని ఆయన ఆరోపించారు. రాష్ట్రానికి నిధులు, అభివృద్ధి ప్రాజెక్టుల విషయంలో కేంద్రం వివక్ష చూపుతోందని విమర్శించారు. ఈ అంశాలపై సమాధానం చెప్పకుండా రాజకీయ విమర్శలకే పరిమితం కావడం సరికాదని అన్నారు.
బీజేపీ, బీఆర్‌ఎస్‌పై విమర్శలు
తెలంగాణలో బీజేపీ నాయకులు చేస్తున్న ‘ఆర్ఆర్ ట్యాక్స్’ ఆరోపణలను మహేష్ కుమార్ గౌడ్ ఖండించారు. బీఆర్‌ఎస్ పదేళ్ల పాలనలో రాష్ట్రం అప్పుల భారంలో కూరుకుపోయిందని, కుటుంబ పాలన కొనసాగిందని విమర్శించారు.
బీఆర్‌ఎస్ బలహీనపడిన నేపథ్యంలో ఆ పార్టీ స్థానాన్ని ఆక్రమించేందుకు బీజేపీ ప్రయత్నిస్తోందని ఆరోపించారు. బీజేపీ, బీఆర్‌ఎస్ మధ్య రాజకీయ సంబంధాలపై ప్రజల్లో అనుమానాలు ఉన్నాయని పేర్కొన్నారు.
ఓటర్ల జాబితా సవరణ, ఓటు చోరీకి సంబంధించి కాంగ్రెస్ లేవనెత్తుతున్న ప్రశ్నలకు కేంద్రం సమాధానం చెప్పాలని డిమాండ్ చేశారు.
తెలంగాణ అభివృద్ధిపై శ్వేతపత్రం విడుదల చేయాలి
మతం, భావోద్వేగాల ఆధారంగా రాజకీయాలు చేయడం బీజేపీకి అలవాటుగా మారిందని మహేష్ కుమార్ గౌడ్ విమర్శించారు. ఎన్నికల సమయంలోనే తెలంగాణ గుర్తుకు వస్తోందని, రాష్ట్ర సమస్యల పరిష్కారంపై కేంద్రం దృష్టి పెట్టడం లేదని ఆరోపించారు.
కాంగ్రెస్ ప్రభుత్వంపై విమర్శలు చేసే ముందు తెలంగాణకు కేంద్రంలోని బీజేపీ ప్రభుత్వం చేసిన అభివృద్ధి ఏమిటో శ్వేతపత్రం విడుదల చేయాలని సవాల్ విసిరారు. రాష్ట్రంలో కాంగ్రెస్ ప్రభుత్వం సంక్షేమ పథకాల అమలుతో పాటు అభివృద్ధికి కృషి చేస్తోందని పేర్కొన్నారు.
తెలంగాణ ప్రజల హక్కులు, ఓటు హక్కు పరిరక్షణతో పాటు రాష్ట్ర అభివృద్ధి కోసం కాంగ్రెస్ పార్టీ పోరాటం కొనసాగిస్తుందని మహేష్ కుమార్ గౌడ్ స్పష్టం చేశారు.