D Educt: Oct 31: ఫిబ్రవరి 24 నుంచి ఇంటర్ పరీక్షలు ప్రారంభించే యోచన.. షెడ్యూల్‌పై కసరత్తు
తెలంగాణ: రాష్ట్రంలో ఇంటర్మీడియట్ వార్షిక పరీక్షలను ఫిబ్రవరి 24వ తేదీ నుంచి ప్రారంభించాలని ఇంటర్మీడియట్ బోర్డు భావిస్తోంది. ఈ మేరకు అధికారులు సబ్జెక్టుల వారీగా పూర్తి పరీక్షల షెడ్యూల్‌ను రూపొందించే ప్రక్రియను దాదాపు పూర్తి చేశారు. ఈసారి ఇంటర్ ఫస్టియర్ సైన్స్ గ్రూపు విద్యార్థులకు కూడా ప్రాక్టికల్ పరీక్షలు నిర్వహించాలని నిర్ణయించారు. ఈ నేపథ్యంలో ఫిబ్రవరి 24 నుంచి పరీక్షలు ప్రారంభించడం సాధ్యం కాకపోతే, మార్చి 3వ తేదీ నుంచి నిర్వహించేలా ప్రత్యామ్నాయ షెడ్యూల్‌ను కూడా సిద్ధం చేసినట్లు సమాచారం.
ఇంటర్మీడియట్ ప్రాక్టికల్ పరీక్షలను ఫిబ్రవరి 1వ తేదీ నుంచి ప్రారంభించే అవకాశమున్నట్లు తెలుస్తోంది. ప్రాక్టికల్స్‌తో పాటు థియరీ పరీక్షలను కూడా నిర్ణీత సమయంలో పూర్తి చేసేలా అధికారులు ప్రణాళికలు రూపొందిస్తున్నారు.
మరోవైపు ఆంధ్రప్రదేశ్‌లో కూడా ఇంటర్మీడియట్ పరీక్షలను ఫిబ్రవరి 24వ తేదీ నుంచే ప్రారంభించేందుకు ఏర్పాట్లు జరుగుతున్నాయి. అయితే రెండు రాష్ట్రాల్లో పరీక్షల నిర్వహణ విధానంలో వ్యత్యాసాలు ఉన్నందున ఒకే రోజు పరీక్షలు ప్రారంభమైనా ఎలాంటి ఇబ్బందులు ఉండకపోవచ్చని అధికారులు భావిస్తున్నారు.
ప్రవేశ పరీక్షలకు సమయం కల్పించేలా ప్రణాళిక
ఈసారి ఎల్‌నినో ప్రభావంతో ఎండల తీవ్రత పెరిగే అవకాశం ఉందని, విద్యుత్ కొరత కూడా తలెత్తవచ్చని ప్రభుత్వం ఇప్పటికే హెచ్చరించింది. మరోవైపు ఇంటర్మీడియట్ పరీక్షలు పూర్తయిన తర్వాతే పదో తరగతి పరీక్షలను ప్రారంభించాల్సి ఉంటుంది. దీంతో ఇంటర్ పరీక్షలు ఆలస్యమైతే విద్యార్థులపై అదనపు ఒత్తిడి పడే అవకాశం ఉంది.
ముఖ్యంగా జేఈఈ మెయిన్, ఎంసెట్, నీట్ వంటి ప్రవేశ పరీక్షలకు సిద్ధమయ్యే విద్యార్థులకు తగినంత సమయం కల్పించాల్సిన అవసరం ఉంది. ఇంటర్ పరీక్షలు ఆలస్యమైతే ప్రవేశ పరీక్షల సన్నద్ధతకు సమయం తగ్గిపోతుంది. ఈ అంశాలన్నింటినీ పరిగణనలోకి తీసుకుని ఫిబ్రవరి 24వ తేదీ నుంచే ఇంటర్మీడియట్ పరీక్షలు ప్రారంభించే దిశగా అధికారులు మొగ్గుచూపుతున్నట్లు సమాచారం.