D News: Oct 29: హైదరాబాద్‌ ఐటీ కారిడార్‌లో ట్రాఫిక్ సమస్యలకు పరిష్కారం చూపేందుకు సైబరాబాద్‌ పోలీసులు కొత్త ప్రణాళికను రూపొందిస్తున్నారు. ప్రతిరోజూ ఉదయం, సాయంత్రం వేళల్లో తీవ్ర రద్దీతో ఇబ్బందులు ఎదుర్కొంటున్న వాహనదారులకు ఉపశమనం కల్పించేందుకు చర్యలు చేపట్టారు. నగరంలోని కేబీఆర్‌ పార్క్‌ పరిసరాల్లో అమలవుతున్న ట్రాఫిక్ విధానాన్ని ఆదర్శంగా తీసుకుని, ఐటీ జోన్‌లోనూ ప్రత్యేక వన్‌వే లూప్‌ మార్గాన్ని ఏర్పాటు చేసే ప్రతిపాదనను పరిశీలిస్తున్నారు. బయోడైవర్సిటీ జంక్షన్‌ నుంచి నాలెడ్జ్‌ సిటీ వరకు ఈ విధానాన్ని అమలు చేసే సాధ్యాసాధ్యాలను అధికారులు క్షేత్రస్థాయిలో అధ్యయనం చేస్తున్నారు.
ప్రతిపాదిత ప్రణాళిక ప్రకారం, వాహనాలు బయోడైవర్సిటీ జంక్షన్‌ నుంచి ప్రారంభమై ఐకియా రోటరీ, రహేజా మైండ్‌స్పేస్‌లోని సీ-గేట్‌ మీదుగా నాలెడ్జ్‌ సిటీ, డల్లాస్‌ సెంటర్‌ వైపు ప్రయాణిస్తాయి. అనంతరం మై హోమ్‌ భూజా భవనం వద్ద కుడివైపునకు మలుపు తీసుకుని తిరిగి బయోడైవర్సిటీ జంక్షన్‌ ప్రాంతానికి చేరుకునేలా మార్గాన్ని రూపొందించాలని భావిస్తున్నారు. ఈ విధానం అమల్లోకి వస్తే అందుబాటులో ఉన్న రహదారులను మెరుగ్గా వినియోగించుకోవడంతో పాటు ప్రధాన కూడళ్ల వద్ద వాహనాల రద్దీని తగ్గించే అవకాశం ఉంటుందని అధికారులు అంచనా వేస్తున్నారు.
ఈ ప్రతిపాదనపై సైబరాబాద్‌ పోలీసు ఉన్నతాధికారులు ఇప్పటికే సంబంధిత ప్రాంతాల్లో పర్యటించి రహదారుల పరిస్థితిని, ట్రాఫిక్ సమస్యలను పరిశీలించారు. వాహనాల రాకపోకలు, రహదారుల సామర్థ్యం, ప్రధాన కూడళ్ల వద్ద ఏర్పడుతున్న రద్దీని అధ్యయనం చేస్తున్నారు. ముఖ్యంగా ఐటీ సంస్థలకు వెళ్లే ఉద్యోగులు, స్థానిక ప్రయాణికులకు ప్రయాణ సమయం తగ్గేలా మార్గాన్ని రూపొందించడంపై దృష్టి సారించారు.
వన్‌వే లూప్‌ విధానాన్ని అమలు చేయడానికి ముందు వాహనాల వేగం, రహదారుల సామర్థ్యాన్ని అంచనా వేసేందుకు సాంకేతిక సిమ్యులేషన్‌ పరీక్షలు నిర్వహించనున్నారు. ఐటీ కంపెనీల ప్రతినిధులు, స్థానిక వ్యాపార సంస్థల యజమానులు, ప్రజలతో సమావేశాలు ఏర్పాటు చేసి వారి అభిప్రాయాలను సేకరించనున్నారు. ఈ సూచనలను పరిగణనలోకి తీసుకున్న తర్వాతే తుది నిర్ణయం తీసుకోనున్నారు.
కొత్త ట్రాఫిక్ విధానాన్ని అమలు చేయాలని నిర్ణయిస్తే, వాహనదారులకు ఇబ్బందులు కలగకుండా దశలవారీగా మార్పులు చేపట్టనున్నారు. మార్గాల మళ్లింపులు, కొత్త రాకపోకల విధానంపై ముందుగానే అధికారిక ప్రకటనలు జారీ చేయనున్నారు. ఈ ప్రతిపాదన కార్యరూపం దాల్చితే ఐటీ కారిడార్‌లో రద్దీ వేళల్లో ట్రాఫిక్ సమస్యలు తగ్గి, ఉద్యోగులు, ఇతర ప్రయాణికులు తమ గమ్యస్థానాలకు వేగంగా చేరుకునే అవకాశం ఉంటుంది. అయితే, ఈ వన్‌వే లూప్‌ విధానం ప్రస్తుతం పరిశీలన దశలోనే ఉంది.