D Spiritual: Oct 28: వాల్మీకిపురం ఆలయాల్లో అక్టోబర్‌ 29 నుంచి బాలాలయం కార్యక్రమాలు
అన్నమయ్య జిల్లా వాల్మీకిపురంలోని శ్రీ సీతా, రామ, లక్ష్మణ, భరత, శత్రుఘ్న సమేత శ్రీ పట్టాభిరామ స్వామివారి ఆలయం, శ్రీదేవి, భూదేవి సమేత శ్రీ రంగనాథ స్వామివారి ఆలయాల్లో అక్టోబర్‌ 29 నుంచి నవంబర్ 1వ తేదీ వరకు బాలాలయం కార్యక్రమాలు నిర్వహించనున్నారు.
అక్టోబర్‌ 29న అంకురార్పణతో ప్రారంభం
బాలాలయం కార్యక్రమాలు అక్టోబర్‌ 29వ తేదీ గురువారం సాయంత్రం అంకురార్పణతో ప్రారంభమవుతాయి. అక్టోబర్‌ 30న చతుస్స్థానార్చన, కళాకర్షణ, ఏకాంతసేవ నిర్వహించనున్నారు.
అక్టోబర్‌ 31న ప్రత్యేక పూజలు
అక్టోబర్‌ 31న చతుస్స్థానార్చన, ప్రాయశ్చిత్త హోమం, కుంభవాహనం, మహాకుంభాభిషేకం, ద్వారదారు విగ్రహ కళావాహనం, షోడశోపచార పూజ, లఘు పూర్ణాహుతి వంటి పూజా కార్యక్రమాలు నిర్వహిస్తారు.
నవంబర్ 1న మహాపూర్ణాహుతి
నవంబర్ 1వ తేదీ ఆదివారం సప్తమి తిథి, పునర్వసు నక్షత్రం, ధనుర్లగ్న పుష్కరాంశంలో ఉదయం 11 గంటల నుంచి 11.30 గంటల వరకు మహాపూర్ణాహుతి నిర్వహించనున్నారు.
గర్భాలయ జీర్ణోద్ధరణ కోసమే బాలాలయం
ఆలయ గర్భాలయంలో జీర్ణోద్ధరణ పనులు చేపట్టే నేపథ్యంలో బాలాలయం నిర్వహిస్తారు. ఇందుకోసం ఆలయ మండపంలో నమూనా ఆలయాన్ని ఏర్పాటు చేసి, గర్భాలయంలోని మూలవిరాట్టుల చిత్రపటాలను ప్రతిష్ఠిస్తారు. అనంతరం మహా సంప్రోక్షణ జరిగే వరకు స్వామివారికి, అమ్మవార్లకు నిర్వహించే నిత్యకైంకర్యాలన్నీ ఈ నమూనా ఆలయంలోనే కొనసాగిస్తారు.