రాయచోటిలో ఘనంగా చౌడేశ్వరి దేవి శరన్నవరాత్రి ఉత్సవాలు.. అమ్మవారి అలంకారాల వివరాలు వెల్లడి

D Spiritual: Oct 10: రాయచోటిలో ఘనంగా చౌడేశ్వరి దేవి శరన్నవరాత్రి ఉత్సవాలు

అక్టోబర్ 11 నుంచి ఉత్సవాలు ప్రారంభం.. అమ్మవారి అలంకారాల వివరాలు వెల్లడి

రాయచోటిలోని స్థానిక శ్రీ చౌడేశ్వరి దేవి ఆలయంలో ఈ నెల 11వ తేదీ నుంచి దసరా శరన్నవరాత్రి ఉత్సవాలను అత్యంత వైభవంగా నిర్వహించనున్నట్లు ఆలయ కమిటీ సభ్యులు తెలిపారు. ఉత్సవాలకు సంబంధించిన అన్ని ఏర్పాట్లు పూర్తి చేసినట్లు ఒక ప్రకటనలో వెల్లడించారు. నవరాత్రుల సందర్భంగా ప్రతిరోజూ అమ్మవారిని వివిధ రూపాల్లో అలంకరించనున్నట్లు పేర్కొన్నారు. భక్తులు పెద్ద సంఖ్యలో ఆలయానికి విచ్చేసి అమ్మవారిని దర్శించుకుని తీర్థప్రసాదాలు స్వీకరించాలని, ఉత్సవాలను విజయవంతం చేయాలని కమిటీ సభ్యులు కోరారు.

నవరాత్రుల అలంకారాల వివరాలు

శరన్నవరాత్రి ఉత్సవాల్లో భాగంగా అక్టోబర్ 11న శ్రీ చౌడేశ్వరి దేవి అలంకరణతో ఉత్సవాలు ప్రారంభం కానున్నాయి. అక్టోబర్ 12న శ్రీ పార్వతి దేవి, 13న శ్రీ గాయత్రి దేవి, 14న శ్రీ రాజరాజేశ్వరి దేవి, 15న శ్రీ అన్నపూర్ణా దేవి అలంకారాల్లో అమ్మవారు భక్తులకు దర్శనమివ్వనున్నారు.

అక్టోబర్ 16న శ్రీ మహాలక్ష్మి దేవి, 17న శ్రీ సరస్వతి దేవి, 18న శ్రీ మహిషాసుర మర్ధిని, 19న శ్రీ దుర్గా దేవి అలంకారాల్లో అమ్మవారిని అలంకరించనున్నారు. అక్టోబర్ 20న శ్రీ విజయలక్ష్మీ దేవి అలంకరణ నిర్వహించనున్నారు.

అక్టోబర్ 21న అమ్మవారి ఉయ్యాల సేవ

నవరాత్రి ఉత్సవాల ముగింపు సందర్భంగా అక్టోబర్ 21న శ్రీ చౌడేశ్వరి దేవికి ఉయ్యాల సేవ నిర్వహించనున్నట్లు ఆలయ కమిటీ సభ్యులు తెలిపారు. ఈ ఉత్సవాల్లో భక్తులు పాల్గొని అమ్మవారి కృపకు పాత్రులు కావాలని వారు కోరారు.