D News : టాలీవుడ్‌లో సినిమా నిర్మాణం, బడ్జెట్ నిర్వహణపై ప్రముఖ రచయిత, నిర్మాత కోన వెంకట్ చేసిన వ్యాఖ్యలు ఇప్పుడు చర్చనీయాంశంగా మారాయి. సరైన ప్రణాళిక లేకుండా షూటింగ్ నిర్వహిస్తూ నిర్మాతల డబ్బును వృథా చేసే దర్శకులపై ఆయన తీవ్ర అసహనం వ్యక్తం చేశారు. సినిమా ఫలితం ఎలా ఉంటుందో ముందుగా చెప్పలేమని, కానీ చిత్రీకరణ విషయంలో మాత్రం పక్కా ప్లానింగ్ తప్పనిసరిగా ఉండాలని స్పష్టం చేశారు. ఆయన చేసిన వ్యాఖ్యలకు సంబంధించిన వీడియోలు ప్రస్తుతం సోషల్ మీడియాలో వైరల్ అవుతున్నాయి.
గంటల ఫుటేజీ తీసి.. చివరికి కట్ చేస్తే ఎలా?
శ్రీవిష్ణు నటించిన ‘కామ్రేడ్ కళ్యాణ్’ సినిమా ప్రమోషన్లలో భాగంగా మాట్లాడిన కోన వెంకట్.. సినిమా నిర్మాణంలో జరుగుతున్న అనవసరపు ఖర్చులపై తన అభిప్రాయాలను వెల్లడించారు. దాదాపు 3 గంటల 50 నిమిషాల ఫుటేజీని చిత్రీకరించిన తర్వాత, ఎడిటింగ్ సమయంలో గంటా 50 నిమిషాల సన్నివేశాలను తొలగిస్తే అంత సమయం, డబ్బు ఖర్చు పెట్టడం వల్ల ప్రయోజనం ఏమిటని ప్రశ్నించారు.
తొలగించిన సన్నివేశాల చిత్రీకరణ కోసం కోట్లాది రూపాయలు ఖర్చవుతాయని ఆయన గుర్తుచేశారు. నిర్మాతలు అప్పులు చేసి, తమ కుటుంబాల భవిష్యత్తును పణంగా పెట్టి సినిమాలపై పెట్టుబడులు పెడతారని పేర్కొన్నారు. అలాంటి డబ్బును బాధ్యత లేకుండా ఖర్చు చేయడం సరైన పద్ధతి కాదని ఆగ్రహం వ్యక్తం చేశారు.
సినిమా ప్లానింగ్ దర్శకుడి బాధ్యతే!
ఒక సినిమా హిట్ అవుతుందా, ఫ్లాప్ అవుతుందా అనేది ఎవరి చేతుల్లోనూ ఉండదని కోన వెంకట్ అభిప్రాయపడ్డారు. అయితే సినిమా నిడివి, సన్నివేశాల చిత్రీకరణ, షూటింగ్ ప్రణాళిక వంటి అంశాలను ముందుగానే సరిగ్గా నిర్వహించడం దర్శకుడి బాధ్యత అని స్పష్టం చేశారు. నిర్మాత పెట్టిన ప్రతి రూపాయికి విలువ ఉండేలా పని చేయాల్సిన అవసరం ఉందని ఆయన వ్యాఖ్యల ద్వారా వెల్లడించారు.
అలాంటి దర్శకులను బ్యాన్ చేయాలన్న కోన వెంకట్
నిర్మాతల డబ్బును వృథా చేస్తూ, కనీస ప్రణాళిక లేకుండా సినిమాలు తెరకెక్కించే దర్శకులను పరిశ్రమ నుంచి నిషేధించాలని కోన వెంకట్ ఘాటుగా వ్యాఖ్యానించారు. ఇలాంటి బాధ్యతారాహిత్యమైన వ్యవహారశైలి సినిమా పరిశ్రమకు నష్టాన్ని కలిగిస్తుందని, నిర్మాతల కుటుంబాలపై కూడా ఆర్థిక భారం పడేలా చేస్తుందని అన్నారు. అటువంటి దర్శకులను క్రిమినల్స్‌తో సమానంగా అభివర్ణించారు.
కోన వెంకట్ చేసిన ఈ వ్యాఖ్యలు ప్రస్తుతం టాలీవుడ్‌లో కొత్త చర్చకు దారితీశాయి. సినిమా నిర్మాణంలో బడ్జెట్ నియంత్రణ ఎంత ముఖ్యమనే అంశంపై మరోసారి చర్చ మొదలైంది. అయితే ఆయన ఎవరిని ఉద్దేశించి ఈ వ్యాఖ్యలు చేశారనే విషయంపై స్పష్టత లేదు.