D Educt: Oct 8: Dasara Holidays 2026: తెలుగు రాష్ట్రాల్లోని పాఠశాలలు, విద్యాసంస్థలకు దసరా సెలవుల షెడ్యూల్‌ను సంబంధిత విద్యాశాఖలు ప్రకటించాయి. దసరా పండుగ సందర్భంగా విద్యార్థులకు ఎన్ని రోజులు సెలవులు ఉంటాయో, సెలవుల అనంతరం విద్యాసంస్థలు ఎప్పుడు పునఃప్రారంభం అవుతాయో అధికారులు స్పష్టం చేశారు.
తెలంగాణలో పాఠశాలలకు 13 రోజుల సెలవులు: తెలంగాణ విద్యాశాఖ ప్రకటించిన షెడ్యూల్ ప్రకారం రాష్ట్రంలోని పాఠశాలలకు అక్టోబర్ 10 నుంచి 22 వరకు దసరా సెలవులు ఉండనున్నాయి. మొత్తం 13 రోజుల పాటు సెలవులు కొనసాగనుండగా, అక్టోబర్ 23న పాఠశాలలు తిరిగి ప్రారంభమవుతాయి.
తెలంగాణలోని జూనియర్ కళాశాలలకు అక్టోబర్ 10 నుంచి 21 వరకు దసరా సెలవులు ప్రకటించారు. సెలవుల అనంతరం ఇంటర్మీడియట్ కళాశాలలు అక్టోబర్ 22న పునఃప్రారంభం కానున్నాయి.
ఆంధ్రప్రదేశ్‌లో దసరా సెలవులు: ఆంధ్రప్రదేశ్‌లోని పాఠశాలలకు అకడమిక్ క్యాలెండర్ ప్రకారం అక్టోబర్ 12 నుంచి 21 వరకు దసరా సెలవులు నిర్ణయించారు. అయితే అక్టోబర్ 10 రెండో శనివారం, అక్టోబర్ 11 ఆదివారం కావడంతో విద్యార్థులకు అక్టోబర్ 10 నుంచే వరుసగా సెలవులు ప్రారంభం కానున్నాయి. సెలవుల అనంతరం ఏపీలో పాఠశాలలు అక్టోబర్ 22న తిరిగి ప్రారంభమవుతాయి.
దసరా సెలవుల సమయంలో ప్రభుత్వ, ప్రైవేట్, ఎయిడెడ్ విద్యాసంస్థలు ప్రత్యేక తరగతులు లేదా అదనపు బోధనా కార్యక్రమాలు నిర్వహించరాదని విద్యాశాఖ అధికారులు స్పష్టం చేశారు. ప్రభుత్వ నిబంధనలను ఉల్లంఘించే విద్యాసంస్థలపై కఠిన చర్యలు తీసుకుంటామని హెచ్చరించారు. విద్యార్థులు సెలవులను సద్వినియోగం చేసుకుంటూ కుటుంబ సభ్యులతో కలిసి దసరా పండుగను ఆనందంగా జరుపుకోవాలని సూచించారు.