D Spiritual: Oct 3: ప్రసిద్ధ జ్యోతిర్లింగ శైవక్షేత్రమైన శ్రీశైలంలో ఆరుద్ర నక్షత్రాన్ని పురస్కరించుకుని శనివారం భ్రమరాంబ సమేత మల్లికార్జున స్వామివార్ల స్వర్ణరథోత్సవం అత్యంత వైభవంగా నిర్వహించారు. ఆరుద్రోత్సవ వేడుకల్లో భాగంగా శనివారం తెల్లవారుజామునే ఆలయ ప్రధానార్చకులు, వేద పండితులు స్వామివారికి మహాన్యాసపూర్వక ఏకాదశ రుద్రాభిషేకం, అన్నాభిషేకంతో పాటు శాస్త్రోక్తంగా ప్రత్యేక పూజలు నిర్వహించారు. భక్తుల శివనామస్మరణలు, వేద మంత్రోచ్ఛారణలతో ఆలయ ప్రాంగణం ఆధ్యాత్మిక వాతావరణంతో నిండిపోయింది.
లోకకల్యాణాన్ని కాంక్షిస్తూ మహా సంకల్పం
స్వర్ణరథోత్సవం ప్రారంభానికి ముందు ఆలయ అర్చకులు వేదోక్తంగా లోకకల్యాణ సంకల్పాన్ని పఠించారు. దేశం శాంతి, సౌభాగ్యాలతో వర్ధిల్లాలని, అతివృష్టి, అనావృష్టి వంటి ప్రకృతి వైపరీత్యాలు తొలగిపోయి సకాలంలో సమృద్ధిగా వర్షాలు కురవాలని ప్రార్థించారు. దేశమంతా పాడిపంటలతో సుభిక్షంగా ఉండాలని ఆకాంక్షించారు.
ప్రజలందరికీ ఆయురారోగ్యాలు ప్రసాదించాలని, అకాల మరణాలు, అగ్ని ప్రమాదాలు, వాహన ప్రమాదాలు సంభవించకుండా కాపాడాలని అర్చకులు స్వామివారిని వేడుకున్నారు. ప్రజలంతా సుఖశాంతులతో జీవించాలని కోరుతూ మహా సంకల్పాన్ని నిర్వహించారు. అనంతరం స్వర్ణరథంపై కొలువుదీరిన శ్రీస్వామిఅమ్మవార్లకు విశేష పూజలు నిర్వహించి మంగళహారతులు సమర్పించారు.
వైభవంగా సాగిన స్వర్ణరథయాత్ర
ఉదయం 7.30 గంటలకు మంగళవాయిద్యాల నడుమ స్వర్ణరథోత్సవం ఘనంగా ప్రారంభమైంది. ఆలయంలోని గంగాధర మండపం నుంచి ప్రారంభమైన రథయాత్ర నంది మండపం వరకు కొనసాగింది. అనంతరం అక్కడి నుంచి ప్రధాన వీధుల మీదుగా భక్తుల జయజయధ్వానాల మధ్య రథయాత్ర సాగింది.
సంప్రదాయ కళల పరిరక్షణలో భాగంగా ఏర్పాటు చేసిన వివిధ కళాబృందాల ప్రదర్శనలు భక్తులను విశేషంగా ఆకట్టుకున్నాయి. కోలాటం, తప్పెట చిందులు తదితర జానపద కళారూపాలు రథయాత్రకు ప్రత్యేక ఆకర్షణగా నిలిచాయి. స్వామివార్ల రథయాత్రను తిలకించేందుకు భక్తులు పెద్ద సంఖ్యలో తరలివచ్చారు.
ఈ స్వర్ణరథోత్సవంలో దేవస్థానం కార్యనిర్వహణాధికారి (ఈవో) ఎం. శ్రీనివాసరావు దంపతులతో పాటు వివిధ విభాగాల అధికారులు, పర్యవేక్షకులు, ఆలయ సిబ్బంది పాల్గొన్నారు.