D NEWS: ఖైరతాబాద్ ఉప ఎన్నిక జరుగుతుందా లేదా అనే దానిపై సస్పెన్స్ కొనసాగుతోంది. 2023 ఎన్నికల్లో దానం నాగేందర్ గెలుపును సవాల్ చేస్తూ విజయారెడ్డి ఎన్నికల పిటిషన్ దాఖలు చేసిన నేపథ్యంలో ఉప ఎన్నికపై న్యాయపరమైన అంశాలు తెరపైకి వచ్చాయి.
దానం నాగేందర్ ఎన్నికపై తాను పిటిషన్ వేశానని విజయారెడ్డి తెలిపారు. కోర్టుపై తనకు పూర్తి నమ్మకం ఉందని, తన వాదనను న్యాయస్థానం అంగీకరిస్తుందని విశ్వసిస్తున్నట్లు చెప్పారు. దానం నాగేందర్ ఎన్నిక చెల్లదని తేలితే తనను ఎమ్మెల్యేగా ప్రకటించే అవకాశం ఉందన్నారు.
ఎన్నికల పిటిషన్‌పై తీర్పు రాకముందే ఉప ఎన్నిక నిర్వహించకూడదని విజయారెడ్డి పేర్కొన్నారు. ఎన్నికల పిటిషన్‌పై తీర్పు రాకుండా ఉప ఎన్నిక నిర్వహించకూడదన్న సుప్రీంకోర్టు తీర్పు ఉందని ఆమె తెలిపారు.
ఒకవేళ తన ఎన్నికల పిటిషన్‌ను పక్కన పెడితే, అందుకు గల కారణాలను పరిశీలించి మళ్లీ కోర్టును ఆశ్రయిస్తానని విజయారెడ్డి స్పష్టం చేశారు. దీంతో ఖైరతాబాద్ ఉప ఎన్నిక అంశంలో న్యాయపరమైన పరిణామాలు కీలకంగా మారాయి.
ఉప ఎన్నిక జరిగే పరిస్థితి వస్తే కాంగ్రెస్ అధిష్టానం ఏ నిర్ణయం తీసుకుంటుందో చూడాల్సి ఉంటుందని విజయారెడ్డి అన్నారు. ప్రస్తుతం ఎన్నికల పిటిషన్‌పై వచ్చే తీర్పు, దాని ఆధారంగా జరిగే తదుపరి పరిణామాలపైనే ఖైరతాబాద్ ఉప ఎన్నికపై స్పష్టత వచ్చే అవకాశం ఉంది.