D News | హైదరాబాద్‌లోని తెలుగు ఫిల్మ్ ఛాంబర్‌లో జరిగిన తెలుగు సినీ కార్మిక సమాఖ్య (ఫెడరేషన్) మీడియా సమావేశం ఒక్కసారిగా ఉద్రిక్తంగా మారింది. డ్యాన్సర్స్ యూనియన్ అధ్యక్షురాలు, కొరియోగ్రాఫర్ జానీ మాస్టర్ భార్య సుమలత తన మద్దతుదారులతో కలిసి సమావేశం జరుగుతున్న హాల్‌లోకి రావడంతో అక్కడ గందరగోళ పరిస్థితులు నెలకొన్నాయి. ఇందుకు సంబంధించిన వీడియో ప్రస్తుతం సోషల్ మీడియాలో వైరల్ అవుతోంది.
ఫెడరేషన్ నాయకులు, డ్యాన్సర్స్ అసోసియేషన్‌కు సంబంధించిన సమావేశం నిర్వహిస్తున్న సమయంలో సుమలత అక్కడికి చేరుకున్నారు. తనకు సమాచారం ఇవ్వకుండా, తనను పిలవకుండా ప్రెస్‌మీట్ ఎలా నిర్వహిస్తారంటూ ఆమె నేతలను ప్రశ్నించారు. కొన్ని పత్రాలు, ఫైల్స్‌తో నేరుగా వేదిక వద్దకు వెళ్లి ఫెడరేషన్ నాయకులతో వాగ్వాదానికి దిగారు.
జానీ మాస్టర్‌పై బ్యాన్ ఎందుకు?
గతంలో జానీ మాస్టర్‌పై విధించిన నాన్-కోఆపరేషన్‌ను తొలగించిన తర్వాత.. మళ్లీ ఆయనను ఎందుకు పని చేయకుండా బ్యాన్ చేశారంటూ సుమలత ఫెడరేషన్ నాయకులను నిలదీశారు. దీనిపై సమాధానం చెప్పాలని ఆమె డిమాండ్ చేశారు.
సుమలత మాట్లాడుతున్న సమయంలో ఫెడరేషన్ సభ్యులు ఆమెను అడ్డుకునే ప్రయత్నం చేయడంతో ఇరువర్గాల మధ్య వాగ్వాదం మరింత పెరిగింది. ఒకరిపై ఒకరు అరుచుకోవడంతో అక్కడ కొద్దిసేపు తీవ్ర గందరగోళం నెలకొంది. మీడియా ప్రతినిధులు, కెమెరాల ముందే ఈ ఘటన జరగడంతో వీడియోలు సోషల్ మీడియాలో వైరల్‌గా మారాయి.
వ్యక్తిగత కక్షతోనే నిర్ణయాలు తీసుకుంటున్నారంటూ ఆరోపణలు
ఈ సందర్భంగా సుమలత తీవ్ర ఆరోపణలు చేశారు. తన భర్త జానీ మాస్టర్ మీడియా ముందుకు వచ్చి ఎవరినీ విమర్శించకపోయినా.. వ్యక్తిగత కక్షతో ఆయనకు నష్టం కలిగించేలా నిర్ణయాలు తీసుకుంటున్నారని ఆమె ఆరోపించారు.
డ్యాన్సర్స్ యూనియన్‌లో జరుగుతున్న అంశాలను తాను ప్రశ్నిస్తున్నందుకే తన భర్తను అడ్డుపెట్టుకుని ఇబ్బందులకు గురి చేస్తున్నారని సుమలత పేర్కొన్నారు. అయితే ఈ ఆరోపణలపై ఫెడరేషన్ వర్గాల స్పందన ఏంటనేది తెలియాల్సి ఉంది.
సుమలత అనూహ్యంగా ప్రెస్‌మీట్‌లోకి రావడంతో ఫిల్మ్ ఛాంబర్‌లో కొద్దిసేపు తీవ్ర ఉద్రిక్త పరిస్థితులు నెలకొన్నాయి. ప్రస్తుతం ఈ ఘటనకు సంబంధించిన వీడియో సోషల్ మీడియాలో చక్కర్లు కొడుతోంది.