D Spiritual: Sept 29: తిరుమలలో భక్తుల రద్దీ కారణంగా వసతి గదుల కేటాయింపు ప్రక్రియ క్లిష్టంగా ఉంటుంది. ఈ నేపథ్యంలో ఆర్టిఫిషియల్ ఇంటెలిజెన్స్ (AI) సామర్థ్యాన్ని పరీక్షించేందుకు ఓ టెక్నాలజీ నిపుణుడు చేసిన ప్రయోగం ఆసక్తికరంగా మారింది.
సదరు టెక్కీ తన లాగిన్ వివరాలను ఉపయోగించి టీటీడీ అధికారిక వెబ్‌సైట్‌లో గది బుక్ చేయాలని ఇటీవల విడుదలైన ‘చాట్‌జిపిటి 6 ఆస్ట్రా’ (ChatGPT 6 Astra) ఏఐ మోడల్‌కు ప్రాంప్ట్ ఇచ్చినట్లు తెలిపాడు. ఏఐ బాట్ అతడి వివరాలతో టీటీడీ వెబ్‌సైట్‌లోకి లాగిన్ అయి, గది ఎంపిక ప్రక్రియను పూర్తి చేసి పేమెంట్ గేట్‌వే వరకు వెళ్లిందని పేర్కొన్నాడు.
అయితే బ్యాంకింగ్ వివరాలు ముందుగా స్టోర్ చేసి లేకపోవడంతో పేమెంట్ దశలో బుకింగ్ ప్రక్రియ నిలిచిపోయిందని టెక్కీ వెల్లడించాడు. ఈ ప్రయోగానికి సంబంధించిన సమాచారం ప్రస్తుతం సోషల్ మీడియాలో వైరల్‌గా మారింది.
ఏఐ ద్వారా టీటీడీ గది బుకింగ్ సాధ్యమేనా?
ఈ విషయం చర్చనీయాంశంగా మారడంతో టీటీడీ ఐటీ విభాగం స్పందించినట్లు సమాచారం. కేవలం ఏఐ ప్రాంప్ట్ లేదా బాట్‌ల సహాయంతో తిరుమలలో గది బుకింగ్ చేయడం సాధ్యం కాదని అధికారులు స్పష్టం చేశారు.
టీటీడీ నిబంధనల ప్రకారం ముందస్తు దర్శనం టికెట్, అంటే స్పెషల్ ఎంట్రీ దర్శన్ లేదా స్లాటెడ్ దర్శన్ టికెట్ లేకుండా కేవలం గదిని మాత్రమే బుక్ చేసుకోవడం సాధ్యం కాదని తెలిపారు. వెబ్‌సైట్‌లో ఆధార్ వెరిఫికేషన్, క్యాప్చా (CAPTCHA) సహా పలు భద్రతా వ్యవస్థలు అందుబాటులో ఉన్నాయని పేర్కొన్నారు.
భక్తులు ఏఐ టూల్స్ లేదా అనధికారిక ఏజెంట్లను నమ్మి మోసపోవద్దని టీటీడీ సూచించింది. దర్శనం, వసతి టికెట్లను పొందేందుకు టీటీడీ అధికారిక వెబ్‌సైట్ లేదా అధికారిక ‘టిటిడి దేవస్థానమ్స్’ యాప్‌ను మాత్రమే వినియోగించాలని అధికారులు సూచించారు.