D NEWS: తెలంగాణ భవన్‌లో మహబూబాబాద్ జిల్లా ఇనుగుర్తికి చెందిన పలువురు కాంగ్రెస్ నాయకులు, కార్యకర్తలు బీఆర్‌ఎస్‌లో చేరారు. సత్తూరి యాదగిరి ఆధ్వర్యంలో జరిగిన ఈ చేరిక కార్యక్రమంలో బీఆర్‌ఎస్ వర్కింగ్ ప్రెసిడెంట్ కేటీఆర్ పాల్గొన్నారు. ఈ సందర్భంగా కాంగ్రెస్ ప్రభుత్వంపై ఆయన తీవ్ర విమర్శలు చేశారు.
కేసీఆర్ ప్రజల తీర్పును గౌరవించి కాంగ్రెస్ ప్రభుత్వానికి అవకాశం ఇచ్చారని కేటీఆర్ అన్నారు. అయితే రాష్ట్రంలో ప్రస్తుతం పాత పరిస్థితులు తిరిగి కనిపిస్తున్నాయని విమర్శించారు. మూడేళ్లుగా కేసీఆర్ ప్రజల్లోకి రాకపోయినా గల్లీ గల్లీలో ఆయన పాటలు వినిపిస్తున్నాయని వ్యాఖ్యానించారు.
కేసీఆర్ హయాంలో రైతులు నాట్లు వేసే సమయానికే రైతుబంధు నిధులు ఖాతాల్లో పడేవని కేటీఆర్ గుర్తుచేశారు. రేవంత్ రెడ్డి ప్రభుత్వం ఇప్పటివరకు మూడుసార్లు రైతుబంధు ఎగ్గొట్టిందని ఆయన ఆరోపించారు. 100 రోజుల్లో ఆరు గ్యారెంటీలతో పాటు అన్ని హామీలు అమలు చేస్తామని చెప్పి ఒక్క హామీ కూడా పూర్తిగా అమలు చేయలేదని విమర్శించారు.
మహబూబాబాద్‌లో కాంగ్రెస్‌కు ఓటేసి గెలిపించిన నాయకుడు ప్రజలకు అందుబాటులో లేకుండా పోయారని కేటీఆర్ ఎద్దేవా చేశారు. ఎన్నికల సమయంలో ఇచ్చిన హామీలకు, ప్రస్తుతం అమలవుతున్న విధానాలకు మధ్య తేడా ఉందని ఆయన ఆరోపించారు. రాష్ట్ర ప్రజల పరిస్థితి ‘అన్న వస్త్రానికి పోతే ఉన్న వస్త్రం పోయినట్లు’ మారిందని వ్యాఖ్యానించారు.
రాబోయే రోజుల్లో తెలంగాణ రాజకీయాల్లో మార్పులు వస్తాయని కేటీఆర్ అన్నారు. 2028 ఎన్నికల్లో బీఆర్‌ఎస్ తిరిగి అధికారంలోకి వస్తుందని, కేసీఆర్ మళ్లీ ముఖ్యమంత్రి అవుతారని ఆయన పేర్కొన్నారు. పలు సర్వేలు ఇదే విషయాన్ని స్పష్టం చేస్తున్నాయని కేటీఆర్ చెప్పినప్పటికీ, ఆయన ప్రస్తావించిన సర్వేల వివరాలు వెల్లడించలేదు. సెప్టెంబర్ 28 నుంచి ప్రారంభమయ్యే పట్టభద్రుల ఓటరు నమోదు ప్రక్రియలో ప్రతి ఒక్కరూ పాల్గొనాలని, కాంగ్రెస్, బీజేపీ విధానాలను ప్రజల్లోకి తీసుకెళ్లాలని పార్టీ శ్రేణులకు పిలుపునిచ్చారు.