D NEWS: తెలంగాణలో ఏ ఒక్క పేదవాడు పూరిగుడిసెలో నివసించకూడదన్నదే ప్రజా ప్రభుత్వ లక్ష్యమని మంత్రి పొంగులేటి శ్రీనివాస్ రెడ్డి అన్నారు. జనగామ నియోజకవర్గంలో సుమారు 500 పూరిగుడిసెల కుటుంబాలను గుర్తించి ఇందిరమ్మ ఇళ్లు మంజూరు చేసినట్లు వెల్లడించారు.
జనగామ నియోజకవర్గంలో నిర్వహించిన ఇందిరమ్మ ఇళ్లు, డబుల్ బెడ్‌రూమ్ ఇళ్ల మంజూరు పత్రాల పంపిణీ కార్యక్రమంలో మంత్రి పాల్గొన్నారు. ఇందిరమ్మ ఇళ్ల రెండో విడతలో ఎలాంటి పైరవీలకు తావులేకుండా అత్యంత నిరుపేద కుటుంబాలకు మొదటి ప్రాధాన్యత ఇస్తున్నామని తెలిపారు.
గుడిసెల్లో నివసిస్తున్న కుటుంబాలను గుర్తించి వారికి కొత్త ఇళ్లు మంజూరు చేస్తున్నట్లు మంత్రి పేర్కొన్నారు. జనగామ నియోజకవర్గ పరిధిలో గుర్తించిన సుమారు 500 కుటుంబాలకు ఇందిరమ్మ ఇళ్లు మంజూరు చేసినట్లు చెప్పారు. అర్హులైన లబ్ధిదారులకు వేదికపైనే మంజూరు పత్రాలను అందజేశారు.
ఒక్కో ఇందిరమ్మ ఇంటి నిర్మాణానికి ప్రభుత్వం రూ.5 లక్షల ఆర్థిక సహాయం అందించనుందని పొంగులేటి తెలిపారు. ఈ మొత్తాన్ని నేరుగా లబ్ధిదారుల ఖాతాల్లో జమ చేయనున్నట్లు చెప్పారు. ప్రభుత్వం అందించే సాయాన్ని సద్వినియోగం చేసుకుని త్వరగా పక్కా ఇళ్ల నిర్మాణం పూర్తి చేసుకోవాలని సూచించారు.
పేదల ఆత్మగౌరవాన్ని కాపాడే విధంగా సంక్షేమ పథకాలను అమలు చేస్తామని మంత్రి స్పష్టం చేశారు. సీఎం రేవంత్‌రెడ్డి నాయకత్వంలో ప్రతి గుడిసెను పక్కా ఇల్లుగా మార్చేందుకు ప్రభుత్వం పనిచేస్తోందని తెలిపారు.