D News : మెగా పవర్ స్టార్ రామ్ చరణ్, స్టార్ డైరెక్టర్ సుకుమార్ కాంబినేషన్‌లో తెరకెక్కనున్న RC17పై ఎప్పటికప్పుడు ఆసక్తికరమైన వార్తలు వినిపిస్తున్నాయి. ‘రంగస్థలం’ తర్వాత ఈ కాంబినేషన్‌లో వస్తున్న సినిమా కావడంతో మొదటి నుంచే ఈ ప్రాజెక్ట్‌పై భారీ అంచనాలు నెలకొన్నాయి. ‘పుష్ప 2’ తర్వాత సుకుమార్ తెరకెక్కించనున్న సినిమా కావడంతో ఈ ప్రాజెక్ట్‌పై సినీ వర్గాల్లోనూ ఆసక్తి కొనసాగుతోంది.
తాజా సమాచారం ప్రకారం RC17 పూజా కార్యక్రమాలను విజయదశమి సందర్భంగా అక్టోబర్ 20న నిర్వహించే అవకాశం ఉందనే ప్రచారం జరుగుతోంది. అయితే ఈ తేదీపై మేకర్స్ నుంచి అధికారిక ప్రకటన రావాల్సి ఉంది. పూజా కార్యక్రమాలు పూర్తయితే నవంబర్ నుంచి రెగ్యులర్ షూటింగ్ ప్రారంభించేలా ప్రణాళికలు ఉన్నట్లు టాక్ వినిపిస్తోంది.
భారీ బడ్జెట్‌తో తెరకెక్కనున్న ఈ చిత్రాన్ని మైత్రీ మూవీ మేకర్స్, సుకుమార్ రైటింగ్స్ సంయుక్తంగా నిర్మించనున్నాయి. సినిమాకు సంబంధించిన కథ, నటీనటులు, సాంకేతిక నిపుణుల వివరాలపై కూడా అధికారిక ప్రకటన రావాల్సి ఉంది. ముఖ్యంగా మ్యూజిక్ డైరెక్టర్ విషయంలో ప్రస్తుతం పలు పేర్లు ప్రచారంలో ఉన్నప్పటికీ, ఎలాంటి అధికారిక క్లారిటీ లేదు.
విజయదశమి సందర్భంగా RC17 లాంచ్‌పై స్పష్టత వస్తే.. అదే సమయంలో రెగ్యులర్ షూటింగ్, కీలకమైన కాస్టింగ్ వివరాలపై కూడా మేకర్స్ అప్‌డేట్ ఇచ్చే అవకాశం ఉందని సినీ వర్గాల్లో చర్చ జరుగుతోంది.