D News: బిగ్‌బాస్ తెలుగు సీజన్ 10 రెండో వారం ముగింపునకు చేరుకోవడంతో ఎలిమినేషన్‌పై ఉత్కంఠ నెలకొంది. వీకెండ్ ఎపిసోడ్‌లో ఎవరి జర్నీకి ఎండ్ కార్డ్ పడనుందనే చర్చ ప్రస్తుతం జోరుగా సాగుతోంది. ఈ వారం నామినేషన్స్‌లో త్రిగుణ్, రోహిత్ నాయుడు, ముఖేష్ గౌడ, రామ్ ప్రసాద్, దెబ్జానీ మోదక్, షాలిని, ఝాన్సీ, సృష్టి, సుధీర్, వర్షిణితో పాటు కృష్ణుడు ఉన్నారు.
కృష్ణుడి గేమ్‌పై చర్చ
తాజా సమాచారం ప్రకారం.. నటుడు కృష్ణుడు ఈ వారం బిగ్‌బాస్ హౌస్ నుంచి ఎలిమినేట్ కానున్నట్లు టాక్ వినిపిస్తోంది. నటుడిగా మంచి గుర్తింపు ఉన్నప్పటికీ.. హౌస్‌లోకి వచ్చిన తర్వాత ఆశించిన స్థాయిలో యాక్టివ్‌గా కనిపించలేదనే అభిప్రాయాలు వ్యక్తమవుతున్నాయి. ముఖ్యంగా టాస్కుల్లో పెద్దగా ఇంపాక్ట్ చూపించకపోవడం, ఎక్కువగా సైలెంట్‌గా ఉండటం ఆయనకు ప్రతికూలంగా మారినట్లు ప్రచారం జరుగుతోంది.
ఉపయోగించుకోని ‘స్విచ్ పవర్’
బిగ్‌బాస్ హౌస్‌లోకి వచ్చిన సమయంలో కృష్ణుడికి ‘స్విచ్ పవర్’ లభించింది. ఈ పవర్ ద్వారా గేమ్‌లో తన స్థానాన్ని మరో కంటెస్టెంట్‌తో మార్చుకునే అవకాశం ఉండేది. అవసరాన్ని బట్టి ఇద్దరు కంటెస్టెంట్ల స్థానాలను మార్చుకునే వెసులుబాటు కూడా ఈ పవర్ ద్వారా లభించినట్లు తెలుస్తోంది.
అయితే కృష్ణుడు తనకు వచ్చిన ఈ ప్రత్యేక అవకాశాన్ని గేమ్‌లో పెద్దగా ఉపయోగించుకోలేదు. సరైన సమయంలో పవర్‌ను వినియోగించుకోకపోవడం కూడా ఆయన గేమ్‌పై ప్రభావం చూపిందనే టాక్ వినిపిస్తోంది. ప్రేక్షకుల నుంచి ఆశించిన స్థాయిలో ఓట్లు రాకపోవడంతోనే ఆయన ఎలిమినేషన్ జరిగే అవకాశం ఉందని ప్రచారం జరుగుతోంది. అయితే కృష్ణుడు నిజంగానే ఈ వారం ఎలిమినేట్ అయ్యారా అనేది అధికారిక ఎపిసోడ్‌లోనే తేలనుంది.