D News: రౌడీ హీరో విజయ్ దేవరకొండ, దర్శకుడు రాహుల్ సాంకృత్యాన్ కాంబినేషన్‌లో తెరకెక్కుతున్న పీరియాడిక్ యాక్షన్ మూవీ **‘రణబాలి’**పై వస్తున్న రూమర్లకు తాజాగా చెక్ పడింది. సినిమా షూటింగ్ పూర్తయినట్లు దర్శకుడు రాహుల్ సాంకృత్యాన్ ప్రకటించడంతో.. దసరా రిలీజ్‌పై క్లారిటీ వచ్చింది. ముందుగా ప్రకటించినట్టుగానే అక్టోబర్ 16న ఈ చిత్రం థియేటర్లలోకి రానుంది.
130 రోజుల షూటింగ్‌కు ప్యాకప్
‘రణబాలి’ కోసం చిత్రబృందం సుదీర్ఘంగా షూటింగ్ నిర్వహించింది. దాదాపు 130 రోజుల పాటు సాగిన చిత్రీకరణ తాజాగా పూర్తయింది. ఈ సందర్భంగా రాహుల్ సాంకృత్యాన్ సోషల్ మీడియాలో షూటింగ్ జర్నీ ముగిసిన విషయాన్ని వెల్లడించారు.
విజయ్ దేవరకొండ, రష్మిక మందన్న జంటగా నటిస్తున్న ఈ సినిమాపై ఇప్పటికే భారీ అంచనాలు ఉన్నాయి. ఇటీవల విడుదలైన టీజర్‌లో విజయ్ సరికొత్త అవతార్‌లో కనిపించడంతో సినిమాపై ఆసక్తి మరింత పెరిగింది.
డిసెంబర్‌కు వాయిదా అంటూ రూమర్స్
‘రణబాలి’ తొలుత సెప్టెంబర్ 11న విడుదల కావాల్సి ఉండగా.. ఆ తర్వాత అక్టోబర్ 16కి వాయిదా పడింది. రష్మిక గాయపడటంతో రిలీజ్ డేట్ మారినట్లు అప్పట్లో రిపోర్టులు వచ్చాయి.
అయితే తాజాగా సినిమా షూటింగ్ పూర్తవడంతో.. మరోసారి డిసెంబర్‌కు వాయిదా పడుతుందంటూ సోషల్ మీడియాలో జరుగుతున్న ప్రచారానికి తెరపడినట్లైంది. మేకర్స్ ప్రకటించిన షెడ్యూల్ ప్రకారమే అక్టోబర్ 16న సినిమా విడుదల కానుంది.
దసరా బరిలో విజయ్, రష్మిక
19వ శతాబ్దపు నేపథ్యంతో రూపొందుతున్న ఈ పీరియాడిక్ యాక్షన్ డ్రామాలో రష్మిక జయమ్మ పాత్రలో నటిస్తోంది. ఆర్నాల్డ్ వోస్లూ కీలక పాత్రలో కనిపించనున్నారు. మైత్రీ మూవీ మేకర్స్ నిర్మిస్తున్న ఈ చిత్రానికి అజయ్-అతుల్ సంగీతం అందిస్తున్నారు.
ఇక షూటింగ్ పూర్తవడంతో ప్రస్తుతం పోస్ట్ ప్రొడక్షన్ పనులపై చిత్రబృందం దృష్టి పెట్టనుంది. ఇప్పటికే అక్టోబర్ 16న విడుదల ఖరారు కావడంతో.. దసరా సందర్భంగా ‘రణబాలి’తో విజయ్ దేవరకొండ ప్రేక్షకుల ముందుకు రానున్నారు.