D News: Sept 11: తెలంగాణ ఉద్యోగులకు రెండు డీఏలు.. సీఎం రేవంత్ కీలక హామీ
తెలంగాణ రాష్ట్ర ప్రభుత్వ ఉద్యోగులు, ఉపాధ్యాయులు, పెన్షనర్లకు త్వరలోనే రెండు డీఏలు (కరువు భత్యం) విడుదల చేసే అంశంపై ప్రభుత్వం కసరత్తు చేస్తోంది. అసెంబ్లీ సమావేశాల సందర్భంగా ఉద్యోగ సంఘాల జేఏసీ నేతలు ముఖ్యమంత్రి రేవంత్ రెడ్డిని కలిసి తమ సమస్యలను వివరించారు. పెండింగ్‌లో ఉన్న ఐదు డీఏల్లో కనీసం మూడు డీఏలకు వెంటనే ఉత్తర్వులు జారీ చేయాలని వారు సీఎంను కోరారు.
ఉద్యోగ సంఘాల విజ్ఞప్తిపై సీఎం రేవంత్ రెడ్డి సానుకూలంగా స్పందించినట్లు సమాచారం. ఈ అంశంపై ఆర్థిక శాఖ అధికారులతో త్వరలో సమీక్ష నిర్వహిస్తామని హామీ ఇచ్చారు. ఈ నెల 18న ప్రభుత్వ ప్రధాన కార్యదర్శి నిర్వహించనున్న సమావేశంలో డీఏలపై స్పష్టత వచ్చే అవకాశం ఉందని తెలుస్తోంది.
రెండు డీఏలపై ఆర్థిక శాఖ కసరత్తు
ఉద్యోగులకు పెండింగ్‌లో ఉన్న డీఏలను చెల్లించడం వల్ల ప్రభుత్వంపై భారీగా ఆర్థిక భారం పడనుంది. రెండు డీఏలను మంజూరు చేస్తే ప్రభుత్వంపై ప్రతి ఏడాది సుమారు రూ.6 వేల కోట్ల వరకు అదనపు భారం పడుతుందని ఆర్థిక శాఖ అంచనా వేస్తోంది. అయినప్పటికీ ఉద్యోగుల సంక్షేమాన్ని దృష్టిలో ఉంచుకుని రెండు డీఏలను విడుదల చేయాలని ప్రభుత్వం యోచిస్తున్నట్లు సమాచారం.
మొదటి డీఏకు సుమారు రూ.3,700 కోట్లు, రెండో డీఏకు రూ.2,300 కోట్ల వరకు ఆర్థిక భారం పడుతుందని అధికారులు అంచనా వేశారు. ఈ రెండు డీఏలను ఒకేసారి మంజూరు చేసి వచ్చే నెల జీతాల నుంచి చెల్లిస్తే.. నెలకు అదనంగా సుమారు రూ.500 కోట్ల భారం పడనుంది.
నిధుల సమీకరణపై అధికారుల దృష్టి
డీఏల చెల్లింపుల కోసం అవసరమైన నిధులను సర్దుబాటు చేయడంతో పాటు కొత్త రుణాల సేకరణపై కూడా ఆర్థిక శాఖ అధికారులు కసరత్తు చేస్తున్నట్లు తెలుస్తోంది. ముందుగా రెండు డీఏలను అమలు చేసిన తర్వాతే మూడో డీఏపై నిర్ణయం తీసుకునే అవకాశం ఉందని అధికార వర్గాలు చెబుతున్నాయి.
పీఆర్సీ అమలుపైనా చర్చ
దసరా నాటికి పీఆర్సీ అమలు చేసేలా చర్యలు తీసుకోవాలని ఉద్యోగ సంఘాల జేఏసీ నేతలు ముఖ్యమంత్రిని కోరారు. పీఆర్సీ నివేదిక పూర్తిగా అందిన తర్వాత ఉద్యోగ సంఘాల ప్రతినిధులతో ప్రత్యేకంగా చర్చించి నిర్ణయం తీసుకుంటామని సీఎం హామీ ఇచ్చినట్లు సమాచారం.
ప్రస్తుతం అసెంబ్లీ సమావేశాల కారణంగా సమయం కుదరడం లేదని, సమావేశాలు ముగిసిన వెంటనే రాష్ట్ర ఆర్థిక పరిస్థితిని సమీక్షిస్తామని సీఎం స్పష్టం చేసినట్లు తెలుస్తోంది. ఉద్యోగ సంఘాలకు సంబంధించిన ఓడీ సౌకర్యం పెండింగ్‌లో ఉందని నేతలు ప్రస్తావించగా.. దీనిపైనా సీఎం సానుకూలంగా స్పందించినట్లు సమాచారం.
ఉద్యోగులకు త్వరలో స్పష్టత?
గత జనవరి నుంచి ఇప్పటివరకు పెండింగ్ బిల్లుల కోసం సుమారు రూ.10 వేల కోట్లు విడుదల చేసినట్లు సీఎం రేవంత్ రెడ్డి గుర్తు చేసినట్లు సమాచారం. ఉద్యోగులు, ఉద్యోగ సంఘాల ప్రతినిధులు ఎప్పుడైనా తనను కలవచ్చని, తన కార్యాలయ ద్వారాలు ఎల్లప్పుడూ తెరిచే ఉంటాయని సీఎం పేర్కొన్నట్లు తెలుస్తోంది.
రెండు డీఏల విడుదలపై సీఎం సానుకూలంగా స్పందించడంతో ఉద్యోగ సంఘాల నేతలు హర్షం వ్యక్తం చేశారు. రాబోయే కీలక సమావేశాల్లో డీఏలు, పీఆర్సీ అంశాలపై ప్రభుత్వం స్పష్టమైన నిర్ణయం తీసుకునే అవకాశం ఉందని ఉద్యోగులు ఆశిస్తున్నారు.