D News: ఉద్యోగ సంఘాలు తలపెట్టిన చలో హైదరాబాద్ కార్యక్రమానికి అనుమతి ఇవ్వకుండా అడ్డుకోవడం అప్రజాస్వామికమని మాజీ మంత్రి వి. శ్రీనివాస్ గౌడ్ ఆరోపించారు. ఉద్యోగులను భయపెట్టి ప్రభుత్వం గుప్పిట్లో పెట్టుకోవాలని చూస్తే అది సాధ్యం కాదని స్పష్టం చేశారు.
ఉద్యోగుల చలో హైదరాబాద్‌కు అనుమతిపై ఫైర్
ఈ నెల 10న ఉద్యోగ సంఘాల ఆధ్వర్యంలో నిర్వహించనున్న చలో హైదరాబాద్ కార్యక్రమానికి ఇప్పటివరకు అనుమతి ఇవ్వకపోవడంపై శ్రీనివాస్ గౌడ్ ఆగ్రహం వ్యక్తం చేశారు.
తెలంగాణ భవన్‌లో నిర్వహించిన మీడియా సమావేశంలో ఆయన మాట్లాడారు. ఉద్యోగులను భయపెట్టి నియంత్రించాలని చూస్తే ఎట్టి పరిస్థితుల్లోనూ సాధ్యం కాదని అన్నారు.
కాంగ్రెస్ హామీలపై శ్రీనివాస్ గౌడ్ విమర్శలు
ఎన్నికల సమయంలో ఉద్యోగులకు కాంగ్రెస్ ప్రభుత్వం అనేక హామీలు ఇచ్చిందని శ్రీనివాస్ గౌడ్ పేర్కొన్నారు. అధికారంలోకి వచ్చిన తర్వాత వాటి అమలులో కాలయాపన చేస్తోందని విమర్శించారు.
ఆరు గ్యారంటీల పేరుతో ప్రజలకు, ఉద్యోగులకు ఇచ్చిన హామీలు నెరవేర్చడం లేదని ఆరోపించారు. లక్షలాది మంది ఉద్యోగుల సమస్యలను సంవత్సరాలుగా పెండింగ్‌లో ఉంచడం సరికాదని అన్నారు.
OPS, PRC హామీలపై ప్రశ్నలు
CPSను రద్దు చేసి ఆరు నెలల్లో OPS తీసుకొస్తామని కాంగ్రెస్ హామీ ఇచ్చిందని శ్రీనివాస్ గౌడ్ గుర్తుచేశారు. అలాగే ఆరు నెలల్లో PRC ప్రక్రియ పూర్తి చేసి ఉద్యోగులకు అమలు చేస్తామని చెప్పినా హామీలు నెరవేరలేదని విమర్శించారు.
ఉద్యోగుల సమస్యలను మరో రెండు సంవత్సరాల పాటు అడగొద్దని చెప్పడం ఎంతవరకు సమంజసమని ఆయన ప్రశ్నించారు.
పోలీసు శాఖ, హోంగార్డుల సమస్యలపై ప్రస్తావన
పోలీసు శాఖలో DA, TA, ట్రావెలింగ్ అలవెన్స్, రిస్క్ అలవెన్స్ వంటి బకాయిలు ఉన్నాయని శ్రీనివాస్ గౌడ్ అన్నారు. హోంగార్డుల పరిస్థితి కూడా దయనీయంగా ఉందని పేర్కొన్నారు.
ఆశా వర్కర్లు తమ సమస్యలపై ప్రశ్నిస్తే అరెస్టులు చేయడం, కేసులు పెట్టి వేధించడం సరికాదని ఆయన అన్నారు.
గత బీఆర్‌ఎస్ ప్రభుత్వాన్ని ప్రస్తావించిన మాజీ మంత్రి
గత బీఆర్‌ఎస్ ప్రభుత్వం ఉద్యోగుల సంక్షేమానికి ప్రాధాన్యత ఇచ్చిందని శ్రీనివాస్ గౌడ్ పేర్కొన్నారు. ఉద్యోగులకు ఫిట్‌మెంట్ విషయంలో తమ ప్రభుత్వం తీసుకున్న నిర్ణయాలను ఆయన ప్రస్తావించారు.
కాంగ్రెస్ పార్టీ ప్రతిపక్షంలో ఉన్న సమయంలో హైదరాబాద్‌లోని ఎల్బీ స్టేడియంలో సభ నిర్వహించుకునేందుకు అప్పటి బీఆర్‌ఎస్ ప్రభుత్వం అవకాశం కల్పించిందని గుర్తుచేశారు.