D News: Sept 9: కూకట్పల్లిలో భారీ అగ్నిప్రమాదం
మేడ్చల్ జిల్లా పరిధిలోని కూకట్పల్లి ప్రశాంత్నగర్ పారిశ్రామిక వాడలో మంగళవారం భారీ అగ్నిప్రమాదం చోటుచేసుకుంది. స్థానికంగా ఉన్న ఏబీసీ ప్రింటింగ్ పరిశ్రమలో ఒక్కసారిగా మంటలు చెలరేగడంతో పరిసర ప్రాంతాల్లో తీవ్ర భయాందోళనలు నెలకొన్నాయి.
ప్రింటింగ్ పరిశ్రమలో భారీగా పెయింట్లు, రసాయనాలు, ద్రవపదార్థాలు, కాగితపు నిల్వలు ఉండటంతో మంటలు వేగంగా వ్యాపించినట్లు తెలుస్తోంది. కొద్ది నిమిషాల్లోనే మంటలు పరిశ్రమ మొత్తం విస్తరించడంతో భారీగా దట్టమైన పొగలు కమ్ముకున్నాయి. ప్రమాదాన్ని గమనించిన పరిశ్రమ కార్మికులు, స్థానికులు వెంటనే అగ్నిమాపక శాఖ, పోలీసులకు సమాచారం అందించారు.
సమాచారం అందుకున్న వెంటనే అగ్నిమాపక సిబ్బంది పలు ఫైర్ ఇంజిన్లతో సంఘటనా స్థలానికి చేరుకున్నారు. పరిశ్రమలో ఉన్న పెయింట్లు, రసాయనాల కారణంగా మంటల తీవ్రత ఎక్కువగా ఉండటంతో వాటిని అదుపులోకి తీసుకురావడానికి అగ్నిమాపక సిబ్బంది తీవ్రంగా శ్రమిస్తున్నారు. మంటలు పక్కనే ఉన్న ఇతర పరిశ్రమలకు వ్యాపించకుండా ప్రత్యేక చర్యలు చేపట్టారు.
అదృష్టవశాత్తూ ప్రమాదం జరిగిన సమయంలో పరిశ్రమలో ఉన్న కార్మికులు బయటకు పరుగులు తీయడంతో ప్రాణనష్టం తప్పినట్లు ప్రాథమిక సమాచారం. అయితే పరిశ్రమలోని లక్షల రూపాయల విలువైన ప్రింటింగ్ మిషన్లు, కాగితపు నిల్వలు, పెయింట్లు అగ్నికి ఆహుతైనట్లు తెలుస్తోంది.
ఘటనా స్థలానికి చేరుకున్న కూకట్పల్లి పోలీసులు కేసు నమోదు చేసి దర్యాప్తు చేపట్టారు. విద్యుత్ షార్ట్ సర్క్యూట్ వల్లే ప్రమాదం జరిగిందా లేదా మరేదైనా కారణం ఉందా అనే కోణంలో పోలీసులు విచారణ చేస్తున్నారు. అగ్నిప్రమాదంలో జరిగిన నష్టంపై పూర్తి వివరాలు దర్యాప్తు అనంతరం వెల్లడయ్యే అవకాశం ఉంది.