D News: రాకింగ్ స్టార్ యశ్ నటించిన ‘టాక్సిక్’ సినిమాకు బాక్సాఫీస్ ఫలితం గట్టి షాక్ ఇచ్చినట్లు తెలుస్తోంది. భారీ బడ్జెట్తో తెరకెక్కిన ఈ సినిమాపై విడుదలకు ముందు భారీ అంచనాలు ఉండగా.. ఇప్పుడు ఓటీటీ హక్కుల విషయంలో పరిస్థితులు పూర్తిగా మారిపోయినట్లు వార్తలు వస్తున్నాయి.
సినిమా విడుదలకు ముందే ‘టాక్సిక్’ డిజిటల్ హక్కుల కోసం రెండు ప్రముఖ ఓటీటీ సంస్థలు కలిసి సుమారు రూ.150 కోట్లకు డీల్ ఆఫర్ చేసినట్లు సమాచారం. అయితే మేకర్స్ మాత్రం రూ.200 కోట్లు డిమాండ్ చేసినట్లు తెలుస్తోంది. ఈ విషయంలో ఇరు వర్గాల మధ్య ధరపై ఏకాభిప్రాయం కుదరకపోవడంతో డిజిటల్ హక్కులను వెంటనే విక్రయించకుండా.. సినిమా విడుదల తర్వాత పరిస్థితిని బట్టి నిర్ణయం తీసుకోవాలని యశ్ భావించినట్లు ప్రచారం జరిగింది.
అయితే సినిమా ఆశించిన స్థాయిలో విజయం సాధించకపోవడంతో ఓటీటీ సంస్థలు తమ ఆఫర్లను భారీగా తగ్గించినట్లు సమాచారం. ప్రస్తుతం జీ స్టూడియోస్ రూ.30 కోట్లకు డిజిటల్ హక్కులను కొనుగోలు చేసేందుకు ముందుకొచ్చినట్లు వార్తలు వినిపిస్తున్నాయి. అంతేకాదు, మిగిలిన ఓటీటీ ప్లాట్ఫామ్లు ఈ డీల్కు దూరంగా ఉన్నట్లు తెలుస్తోంది.
దీంతో ‘టాక్సిక్’ మేకర్స్కు పరిస్థితి ఊహించని విధంగా మారినట్లు టాక్. విడుదలకు ముందు రూ.150 కోట్ల స్థాయిలో ఉన్న ఓటీటీ డీల్.. ఇప్పుడు రూ.30 కోట్లకు పడిపోతే, భారీ బడ్జెట్తో తెరకెక్కిన సినిమాకు ఇది పెద్ద నష్టంగా మారే అవకాశం ఉంది.
మరోవైపు ఈ సినిమాను థియేటర్లలో సొంతంగా విడుదల చేయాలనే నిర్ణయం కూడా తీసుకున్నట్లు సమాచారం. భారీ పెట్టుబడులు పెట్టిన నేపథ్యంలో థియేట్రికల్ వసూళ్లు ఆశించిన స్థాయిలో రాకపోతే నిర్మాతలకు నష్టం మరింత పెరిగే అవకాశం ఉందనే చర్చ జరుగుతోంది.
ఈ సినిమాలో యశ్ కేవలం హీరోగానే కాకుండా లాభాల్లో వాటా తీసుకునే విధంగా ఒప్పందం చేసుకున్నట్లు సమాచారం. ముందుగా కొంత పారితోషికం తీసుకున్న ఆయన.. మిగిలిన మొత్తాన్ని సినిమా లాభాల ఆధారంగా పొందే విధంగా ఒప్పందం కుదుర్చుకున్నట్లు ప్రచారం ఉంది.
గీతూ మోహన్దాస్ దర్శకత్వం వహించిన ‘టాక్సిక్’ చిత్రాన్ని కేవీఎన్ ప్రొడక్షన్స్ భారీ స్థాయిలో నిర్మించింది. అయితే ప్రస్తుతం ఓటీటీ డీల్కు సంబంధించి సోషల్ మీడియాలో, ఇండస్ట్రీ వర్గాల్లో వస్తున్న ఈ లెక్కలకు అధికారిక ధృవీకరణ లేదు. మేకర్స్ లేదా సంబంధిత ఓటీటీ సంస్థ నుంచి స్పష్టత వచ్చిన తర్వాతే అసలు డీల్ ఎంత అనేది తేలనుంది.