సర్కారు బడికి ‘యూకేజీ’ జోష్‌

D Educt: Sept 7: ప్రభుత్వ పాఠశాలల్లో ప్రీ ప్రైమరీ తరగతులను ప్రవేశపెట్టడంతో రాష్ట్రంలో ఈసారి మొత్తం విద్యార్థుల సంఖ్య కొంత పెరిగినట్లు కనిపిస్తోంది. గత విద్యా సంవత్సరం (2025-26) పాఠశాల విద్యాశాఖ పరిధిలోని విద్యాసంస్థల్లో ప్రీ ప్రైమరీ నుంచి ఇంటర్ వరకు మొత్తం 19.44 లక్షల మంది విద్యార్థులు చేరారు. ఈసారి ఆ సంఖ్య 19.78 లక్షలకు పెరిగింది. అంటే దాదాపు 34 వేల మంది విద్యార్థులు పెరిగినట్లు లెక్క.

గతేడాది తొలిసారిగా 1,694 ప్రభుత్వ పాఠశాలల్లో ప్రీ ప్రైమరీ తరగతులను ప్రవేశపెట్టారు. దీంతో యూకేజీలో 18,728 మంది విద్యార్థులు చేరారు. ఈ విద్యా సంవత్సరం ప్రీ ప్రైమరీ తరగతులను నిర్వహిస్తున్న పాఠశాలల సంఖ్యను 4,123కు పెంచారు. ఈ పాఠశాలల్లో ఈసారి 64,648 మంది చిన్నారులు ప్రవేశాలు పొందారు. అంటే సగటున ఒక్కో పాఠశాలలో 16 మంది విద్యార్థులు చేరినట్లు తెలుస్తోంది.

అయితే యూకేజీలో మొత్తం 84,460 మంది విద్యార్థులను చేర్పించాలని విద్యాశాఖ లక్ష్యంగా నిర్దేశించుకున్నప్పటికీ.. ఆ లక్ష్యం పూర్తిగా నెరవేరలేదు. నిర్దేశించిన లక్ష్యానికి తగిన స్థాయిలో ప్రవేశాలు జరగకపోవడం గమనార్హం.

మరోవైపు, గతేడాది మొత్తం విద్యార్థుల సంఖ్య నుంచి ప్రీ ప్రైమరీ విద్యార్థులను మినహాయిస్తే.. 1 నుంచి 12వ తరగతి వరకు నికరంగా 19.25 లక్షల మంది విద్యార్థులు ఉన్నారు. ఈ ఏడాది ప్రీ ప్రైమరీలో చేరిన 64,648 మంది విద్యార్థులను పక్కనబెడితే.. 2026-27 విద్యా సంవత్సరంలో 1 నుంచి 12వ తరగతి వరకు విద్యార్థుల సంఖ్య 19,13,846గా ఉంది.

ఈ లెక్కలను పరిశీలిస్తే.. గత విద్యా సంవత్సరంతో పోలిస్తే 1 నుంచి 12వ తరగతి వరకు విద్యార్థుల సంఖ్య 11 వేల మందికి పైగా తగ్గినట్లు స్పష్టమవుతోంది. ఇటీవల జరిగిన స్కూల్ కాంప్లెక్స్ హెచ్‌ఎంల సమావేశంలో పాఠశాల విద్యాశాఖ సంచాలకుడు నవీన్ నికోలస్ కూడా ప్రీ ప్రైమరీ విద్యార్థులను మినహాయిస్తే ఈసారి విద్యార్థుల సంఖ్య తగ్గినట్లేనని స్పష్టం చేసినట్లు హెచ్‌ఎంలు తెలిపారు.

అయితే ఉన్నతాధికారులు ఈ విషయాన్ని పూర్తిగా వెల్లడించకుండా.. రాష్ట్రంలో విద్యార్థుల సంఖ్య పెరిగిందని ముఖ్యమంత్రికి నివేదిస్తున్నారనే విమర్శలు వినిపిస్తున్నాయి. ప్రీ ప్రైమరీ చేరికలను కలిపి మొత్తం విద్యార్థుల సంఖ్యను చూపించడం ద్వారా వాస్తవ పరిస్థితి భిన్నంగా కనిపిస్తోందనే అభిప్రాయాలు వ్యక్తమవుతున్నాయి.

ఇక గతేడాదితో పోలిస్తే ఈసారి విద్యార్థుల నమోదును 10 శాతం పెంచాలని విద్యాశాఖ లక్ష్యంగా పెట్టుకుంది. ఇందులో భాగంగా 21.39 లక్షల మంది విద్యార్థుల నమోదును లక్ష్యంగా నిర్దేశించింది. అయితే చివరకు 19.78 లక్షల మంది విద్యార్థుల వద్దే నమోదు సంఖ్య నిలిచిపోయింది. దీంతో విద్యాశాఖ నిర్దేశించుకున్న లక్ష్యానికి, వాస్తవ నమోదుకు మధ్య గణనీయమైన వ్యత్యాసం ఉన్నట్లు తెలుస్తోంది.