D Educt: Aug 14: GATE 2027: అభ్యర్థులకు కీలక అప్డేట్.. రిజిస్ట్రేషన్ తేదీ మార్పు
గ్రాడ్యుయేట్ ఆప్టిట్యూడ్ టెస్ట్ ఇన్ ఇంజినీరింగ్ (GATE 2027) పరీక్షకు సన్నద్ధమవుతున్న అభ్యర్థులకు కీలక అప్డేట్ వచ్చింది. GATE 2027 షెడ్యూల్లో ఐఐటీ మద్రాస్ మార్పులు చేసింది. తొలుత ప్రకటించిన ప్రకారం ఆగస్టు 14 నుంచి ప్రారంభం కావాల్సిన ఆన్లైన్ రిజిస్ట్రేషన్ ప్రక్రియను ఆగస్టు 27కు వాయిదా వేసింది.
అర్హత ఉన్న అభ్యర్థులు ఆగస్టు 27 నుంచి సెప్టెంబర్ 27 వరకు ఎలాంటి ఆలస్య రుసుము లేకుండా GATE 2027కు దరఖాస్తు చేసుకోవచ్చు. ఆలస్య రుసుముతో అక్టోబర్ 5 వరకు దరఖాస్తు చేసుకునే అవకాశం కల్పించారు. అయితే పరీక్ష తేదీల్లో మాత్రం ప్రస్తుతం ఎలాంటి మార్పు లేదని ఐఐటీ మద్రాస్ స్పష్టం చేసింది.
రిజిస్ట్రేషన్కు డిజిలాకర్ తప్పనిసరి
GATE 2027 దరఖాస్తు ప్రక్రియలో డిజిలాకర్ ఖాతాను అనుసంధానం చేయడం తప్పనిసరి అని ఐఐటీ మద్రాస్ తెలిపింది. దరఖాస్తు చేసుకునే ముందు అభ్యర్థులు తమ డిజిలాకర్ ఖాతాను క్రియేట్ చేసుకోవడం లేదా ఇప్పటికే ఉన్న ఖాతాను అప్డేట్ చేసుకోవాలని సూచించింది.
ఆన్లైన్ రిజిస్ట్రేషన్ సమయంలో డిజిలాకర్ను GATE పోర్టల్కు లింక్ చేయాల్సి ఉంటుంది. దీని ద్వారా అభ్యర్థుల ధ్రువీకరించిన వ్యక్తిగత సమాచారాన్ని పోర్టల్ సురక్షితంగా సేకరించేందుకు వీలవుతుందని ఐఐటీ మద్రాస్ పేర్కొంది. ఈ విధానం వల్ల దరఖాస్తు ప్రక్రియ వేగంగా, మరింత కచ్చితంగా పూర్తయ్యే అవకాశం ఉంటుందని తెలిపింది.
అభ్యర్థి అనుమతి ఇచ్చిన తర్వాత వారి పేరు, పుట్టిన తేదీ, ప్రొఫైల్ ఫొటో, వెరిఫైడ్ గుర్తింపు పత్రం నంబర్, ఈ-మెయిల్ అడ్రస్, మొబైల్ నంబర్, ఇంటి చిరునామా వంటి వివరాలను పోర్టల్ ఆటోమేటిక్గా సేకరించనుంది. దీంతో దరఖాస్తులో వ్యక్తిగత వివరాలను మళ్లీ మళ్లీ నమోదు చేయాల్సిన అవసరం తగ్గనుంది.
ఫిబ్రవరిలో GATE 2027 పరీక్షలు
ఇప్పటికే ప్రకటించిన షెడ్యూల్ ప్రకారం GATE 2027 పరీక్షలు వచ్చే ఏడాది ఫిబ్రవరి 6, 7, 13, 14, 20, 21 తేదీల్లో నిర్వహించనున్నారు. పరీక్షలు ఆన్లైన్ విధానంలో నిర్వహించనున్నారు. పరీక్షకు సంబంధించిన ఇతర వివరాలను అధికారిక షెడ్యూల్ ప్రకారం అభ్యర్థులు తెలుసుకోవచ్చు.
GATE 2027 ఫలితాలను మార్చి 19న విడుదల చేయనున్నట్లు ఐఐటీ మద్రాస్ ప్రకటించింది. కాబట్టి అభ్యర్థులు రిజిస్ట్రేషన్ తేదీలతో పాటు పరీక్ష, ఫలితాల తేదీలను కూడా ముందుగానే గుర్తుంచుకోవాలి.
ఏమిటీ డిజిలాకర్?
సర్టిఫికెట్లు, విద్యా పత్రాలు, ఇతర ముఖ్యమైన డాక్యుమెంట్లను డిజిటల్ రూపంలో భద్రపరచుకోవడం, అవసరమైనప్పుడు వాటిని షేర్ చేయడం, ధ్రువీకరించుకోవడం కోసం కేంద్ర ప్రభుత్వం అందుబాటులోకి తీసుకొచ్చిన డిజిటల్ వేదికే డిజిలాకర్.
మినిస్ట్రీ ఆఫ్ ఎలక్ట్రానిక్స్ అండ్ ఇన్ఫర్మేషన్ టెక్నాలజీ ఆధ్వర్యంలో పేపర్లెస్ విధానాన్ని ప్రోత్సహించే ఉద్దేశంతో ఈ సేవను అందిస్తున్నారు. డిజిలాకర్లో ఖాతా తెరిచి విద్యా సర్టిఫికెట్లు, ఇతర ముఖ్యమైన డాక్యుమెంట్లను డిజిటల్గా భద్రపరుచుకోవచ్చు.
డిజిలాకర్ ఖాతాను సృష్టించేందుకు మొబైల్ లేదా ఆధార్ నంబర్ వంటి వివరాలను ఉపయోగించవచ్చు. ధ్రువీకరణ కోసం వన్టైమ్ పాస్వర్డ్ (OTP) వస్తుంది. ధ్రువీకరణ పూర్తయిన తర్వాత డిజిలాకర్ ఖాతాను ఉపయోగించి అవసరమైన డిజిటల్ పత్రాలను సురక్షితంగా యాక్సెస్ చేసుకోవచ్చు.