D Educt: Aug 13: ఆంధ్రప్రదేశ్ డిప్లొమా ఇన్ ఎలిమెంటరీ ఎడ్యుకేషన్ కామన్ ఎంట్రెన్స్ టెస్ట్ (AP DEECET) 2026లో అర్హత సాధించిన అభ్యర్థులకు ఆగస్టు 13 నుంచి రెండో విడత కౌన్సెలింగ్ ప్రారంభం కానుంది. ఈ నెల 13 నుంచి 16వ తేదీ వరకు కౌన్సెలింగ్ ప్రక్రియ కొనసాగుతుందని రాష్ట్ర కన్వీనర్, పాఠశాల విద్య సంయుక్త సంచాలకులు బి. లింగేశ్వర రెడ్డి తెలిపారు.
రాష్ట్రంలోని ప్రభుత్వ, ప్రైవేట్ డీఈడీ (D.Ed) కళాశాలల్లో మిగిలిపోయిన సీట్లను భర్తీ చేసేందుకు ఈ రెండో విడత కౌన్సెలింగ్ నిర్వహిస్తున్నారు. అర్హత సాధించిన అభ్యర్థులు నిర్ణీత గడువులోగా కౌన్సెలింగ్ ప్రక్రియలో పాల్గొని వెబ్ ఆప్షన్లు నమోదు చేసుకోవాల్సి ఉంటుంది.
వెబ్ ఆప్షన్లు నమోదు చేసుకున్న అభ్యర్థులకు ఆగస్టు 17 నుంచి 20వ తేదీ మధ్య సీట్ల కేటాయింపు ప్రక్రియ నిర్వహించనున్నారు. అభ్యర్థులు తమకు కేటాయించిన కళాశాల వివరాలను పరిశీలించుకుని తదుపరి అడ్మిషన్ ప్రక్రియను పూర్తి చేసుకోవాల్సి ఉంటుంది.
సీట్లు పొందిన అభ్యర్థులు ఆగస్టు 21 నుంచి 24వ తేదీలోగా సంబంధిత డైట్ (DIET) కళాశాలల్లో తమ ఒరిజినల్ సర్టిఫికెట్లను సమర్పించాలి. అనంతరం అడ్మిషన్ లెటర్‌ను పొందాల్సి ఉంటుంది.
డీఈడీ మొదటి సంవత్సరం తరగతులు ఆగస్టు 27వ తేదీ నుంచి ప్రారంభం కానున్నాయి. కాబట్టి సీట్లు పొందిన అభ్యర్థులు నిర్ణీత తేదీల్లో ధ్రువపత్రాల పరిశీలన, అడ్మిషన్ ప్రక్రియను పూర్తి చేసుకుని తరగతులకు హాజరు కావాలని అధికారులు సూచించారు.