D Educt: Aug 13: వైద్య విద్యలో ప్రవేశాల కోసం 2027లో నిర్వహించనున్న NEET UG పరీక్షకు సిద్ధమవుతున్న తెలంగాణ విద్యార్థులకు సాంఘిక సంక్షేమ గురుకుల విద్యాలయాల సంస్థ (TGSWREIS) మంచి అవకాశాన్ని అందిస్తోంది. అర్హులైన విద్యార్థులకు ఉచితంగా లాంగ్టర్మ్ నీట్ కోచింగ్ అందించేందుకు సంస్థ దరఖాస్తులను ఆహ్వానించింది. ఆసక్తి ఉన్న అభ్యర్థులు ఆగస్టు 22లోగా దరఖాస్తు చేసుకోవాలని సొసైటీ కార్యదర్శి కంభంపాటి శారద తెలిపారు.
2026-27 విద్యా సంవత్సరానికి నిర్వహించనున్న ఈ ప్రత్యేక కోచింగ్ కార్యక్రమంలో మొత్తం 200 మంది విద్యార్థులకు అవకాశం కల్పించారు. ఇందులో 100 మంది బాలురకు చిలుకూరులోని TGSWR ఫౌండేషన్ సెంటర్ ఆఫ్ ఎక్స్లెన్స్లో, మరో 100 మంది బాలికలకు మహేంద్రహిల్స్లోని ఫౌండేషన్ సెంటర్లో శిక్షణ ఇవ్వనున్నారు.
2025-26 విద్యా సంవత్సరంలో ఏదైనా కళాశాల నుంచి బైపీసీ విభాగంలో ఇంటర్మీడియట్ పూర్తి చేసిన విద్యార్థులు ఈ కోచింగ్కు అర్హులు. అలాగే 2026లో NEET పరీక్షకు హాజరైన అభ్యర్థులు కూడా దరఖాస్తు చేసుకోవచ్చు. ఎస్సీ, ఎస్టీ, ఓబీసీ, ఈడబ్ల్యూఎస్ కేటగిరీలకు చెందిన అర్హులైన విద్యార్థులు ఈ అవకాశాన్ని వినియోగించుకోవచ్చు.
అభ్యర్థులు TGSWREIS అధికారిక వెబ్సైట్ నుంచి నోటిఫికేషన్, దరఖాస్తు ఫారాన్ని పొందాలి. అనంతరం దరఖాస్తు ఫారాన్ని పూర్తిగా నింపి, అవసరమైన ధ్రువపత్రాలను జతచేసి సంబంధిత కోచింగ్ కేంద్రాల్లో TGSWREIS జిల్లా సమన్వయకర్త (DCO) ద్వారా సమర్పించాలి. బాలుర దరఖాస్తులను చిలుకూరు కేంద్రంలో, బాలికల దరఖాస్తులను మహేంద్రహిల్స్ కేంద్రంలో సమర్పించాల్సి ఉంటుంది.
ఈ కోచింగ్ కార్యక్రమానికి ఎలాంటి దరఖాస్తు రుసుం లేదు. అర్హత కలిగిన విద్యార్థులు ఆగస్టు 22 గడువులోపు దరఖాస్తు చేసుకుని ఉచిత NEET లాంగ్టర్మ్ కోచింగ్ అవకాశాన్ని సద్వినియోగం చేసుకోవాలని అధికారులు సూచించారు.