తెలంగాణలోని స్థానికులకు పర్యాటక రంగం ద్వారా అదనపు ఆదాయం కల్పించేందుకు ప్రభుత్వం త్వరలోనే ఒక ప్రత్యేక హోమ్‌స్టే పథకాన్ని ప్రారంభించనుంది. దీని ద్వారా నివాస గృహాలను పర్యాటకుల బసకు వినియోగించుకునేందుకు యజమానుల నుంచి దరఖాస్తులను ఆహ్వానిస్తుంది. తెలంగాణ టూరిజం పాలసీ 2025-30లో భాగంగా ప్రవేశపెట్టిన ఈ పథకం ద్వారా గ్రామీణ, పట్టణ, గిరిజన ప్రాంతాల సంస్కృతి, వంటకాలు, హస్తకళలను పర్యాటకులకు పరిచయం చేయడమే కాక.. భారీ కమర్షియల్ నిర్మాణాలు లేకుండానే వసతి సామర్థ్యాన్ని పెంచాలని ప్రభుత్వం లక్ష్యంగా పెట్టుకుంది.
మీ ఇంటినే హోటల్‌గా మార్చుకొని అదనపు ఆదాయం పొందొచ్చు. మారుమూల గ్రామీణ ప్రాంతంలో ఇల్లు ఉన్నా సరే టూరిజం ద్వారా డబ్బులు సంపాదించుకోవచ్చు. అందుకు అనుగుణంగా పర్యాటక రంగాన్ని కొత్త దిశగాతీసుకెళ్లేందుకు తెలంగాణ ప్రభుత్వం కీలక అడుగు వేస్తోంది. ఇకపై రాష్ట్రంలోని ఇళ్లనే పర్యాటక వసతులుగా మార్చి కుటుంబాలు అదనపు ఆదాయం పొందేలా ప్రత్యేక హోమ్‌స్టే పథకాన్ని అమలు చేయనుంది. ఈ మేరకు పర్యాటక శాఖ త్వరలో రాష్ట్రవ్యాప్తంగా అర్హత కలిగిన ఇంటి ఓనర్ల నుంచి దరఖాస్తులను ఆహ్వానించనుంది.
తెలంగాణ టూరిజం పాలసీ 2025-30లో భాగంగా ఈ హోమ్‌స్టే విధానాన్ని రూపొందించారు. పర్యాటక రంగాన్ని హైదరాబాద్‌ వంటి ప్రధాన నగరాలు, సంప్రదాయ హోటళ్లకే పరిమితం చేయకుండా గ్రామీణ, గిరిజన ప్రాంతాల వరకు విస్తరించడం ఈ పథకం ప్రధాన ఉద్దేశం. తద్వారా సాధారణ కుటుంబాలు కూడా పర్యాటక రంగంలో చిన్న స్థాయి వ్యాపారవేత్తలుగా మారే అవకాశం కల్పించాలని ప్రభుత్వం భావిస్తోంది. హోమ్‌స్టే నమోదుకు వచ్చిన దరఖాస్తులను 30 పని దినాల్లో పరిష్కరించేలా మార్గదర్శకాలు రూపొందించారు. ఒకసారి నమోదు చేసుకున్న హోమ్‌స్టేకు రెండేళ్ల పాటు రిజిస్ట్రేషన్‌ చెల్లుబాటు అవుతుంది. ప్రభుత్వం ఈ వ్యవస్థలో ప్రధానంగా ఫెసిలిటీ, ప్రచారకర్త పాత్ర పోషించనుంది.
ప్రైవేటు ఇళ్లు, వారసత్వ భవనాలు, సంప్రదాయ గృహాలు, గ్రామీణ ఇళ్లు, గిరిజన ప్రాంతాల్లోని సంప్రదాయ నివాసాలు, కొన్ని రకాల నివాస అపార్ట్‌మెంట్లు హోమ్‌స్టే పథకానికి అర్హత పొందవచ్చు. అయితే హోటళ్లు, రిసార్టులు, లాడ్జీలు, హాస్టళ్లు, పేయింగ్‌ గెస్ట్‌ వసతులు, డార్మిటరీలు, సర్వీస్డ్‌ అపార్ట్‌మెంట్లను హోమ్‌స్టేలుగా నమోదు చేయరు. నమోదైన హోమ్‌స్టేలను మూడు కేటగిరీలుగా వర్గీకరించనున్నారు. వివిధ శాఖలకు చెందిన అధికారులతో కూడిన కమిటీ సంబంధిత ఇళ్లను పరిశీలించి కేటగిరీలపై సిఫారసులు చేస్తుంది. తుది ఆమోదం పర్యాటక శాఖకు ఉంటుంది. అర్హత పొందిన యజమానులకు కేటగిరి సర్టిఫికెట్ అందించడంతోపాటు తెలంగాణ టూరిజం ప్రచార వేదికల్లో డిజిటల్‌ లిస్టింగ్‌ కల్పిస్తారు.