D News: Aug 8: పెద్ది కుటుంబానికి కేసీఆర్ భారీ ఆర్థిక సాయం
బీఆర్ఎస్ సీనియర్ నేత, మాజీ ఎమ్మెల్యే పెద్ది సుదర్శన్ రెడ్డి ఇటీవల గుండెపోటుతో అకస్మాత్తుగా మృతి చెందారు. ఈ విషాద సమయంలో ఆయన కుటుంబానికి బీఆర్ఎస్ అధినేత, మాజీ ముఖ్యమంత్రి కే. చంద్రశేఖర్ రావు అండగా నిలిచారు. పెద్ది సుదర్శన్ రెడ్డి కుటుంబ భవిష్యత్తు, సంక్షేమాన్ని దృష్టిలో ఉంచుకుని పార్టీ తరఫున రూ.2.25 కోట్ల ఆర్థిక సహాయం అందించాలని కేసీఆర్ నిర్ణయించినట్లు సమాచారం.
పిల్లల భవిష్యత్తు కోసం రూ.2 కోట్లు
పెద్ది సుదర్శన్ రెడ్డి మృతితో కుటుంబం తీవ్ర విషాదంలో ఉన్న నేపథ్యంలో, ఆయన పిల్లల భవిష్యత్తుకు ఆర్థిక భరోసా కల్పించేలా కేసీఆర్ ప్రత్యేక నిధులు కేటాయించారు. ఇందులో భాగంగా సుదర్శన్ రెడ్డి ఇద్దరు పిల్లల పేరు మీద చెరో రూ.1 కోటి చొప్పున మొత్తం రూ.2 కోట్లను అందించనున్నట్లు తెలుస్తోంది.
తల్లి అమృతమ్మకు మరో రూ.25 లక్షలు
పెద్ది సుదర్శన్ రెడ్డి తల్లి అమృతమ్మ వృద్ధాప్యంలో ఉన్న నేపథ్యంలో ఆమె వైద్యం, ఇతర అవసరాల కోసం కూడా కేసీఆర్ ప్రత్యేకంగా ఆర్థిక సహాయం అందించాలని నిర్ణయించారు. ఆమె సంక్షేమాన్ని దృష్టిలో ఉంచుకుని మరో రూ.25 లక్షలను ఆమె పేరు మీద బ్యాంకు ఖాతాలో జమ చేయనున్నట్లు సమాచారం.
కష్టకాలంలో పార్టీ నాయకులు, కార్యకర్తల కుటుంబాలకు అండగా నిలుస్తామని బీఆర్ఎస్ అధినేత కేసీఆర్ మరోసారి చాటిచెప్పారని పార్టీ వర్గాలు పేర్కొంటున్నాయి.