బోనాల పండుగ సందర్భంగా హైదరాబాద్‌, సైబరాబాద్‌, ఫ్యూచర్‌ సిటీ కమిషనరేట్ల పరిధిలోని పలు ప్రాంతాల్లో మద్యం దుకాణాలు, కల్లు దుకాణాలు, రెస్టారెంట్‌ బార్‌లపై పోలీసులు ఆంక్షలు విధించారు. సైబరాబాద్‌లో కూకట్‌పల్లి, అల్లాపూర్‌, రాయదుర్గం, జీడిమెట్ల, మేడ్చల్‌, చందానగర్‌లో ఆగస్టు 9 ఉదయం 10 నుంచి రాత్రి 10 వరకు షాపులు మూసివేయాలి. హైదరాబాద్‌లో ప్రాంతాన్ని బట్టి ఒకటి లేదా రెండు రోజులు ఆంక్షలు ఉంటాయి. ఫ్యూచర్‌ సిటీలో ఆగస్టు 9 ఉదయం 10 నుంచి మరుసటి రోజు ఉదయం 6 వరకు మూసివేత ఉంటుంది.
మందుబాబులకు బ్యాడ్ న్యూస్. రేపు (ఆగస్టు 9) బోనాల పండుగ సందర్భంగా హైదరాబాద్‌ మహానగరంలో పోలీసులు భద్రతా చర్యలను కట్టుదిట్టం చేశారు. పండుగ వేడుకల సమయంలో శాంతిభద్రతలకు విఘాతం కలగకుండా హైదరాబాద్‌, సైబరాబాద్‌, ఫ్యూచర్‌ సిటీ పోలీస్‌ కమిషనరేట్ల పరిధిలోని కొన్ని ప్రాంతాల్లో మద్యం విక్రయాలపై ఆంక్షలు విధించారు. కల్లు దుకాణాలు, వైన్ షాపులతోపాటు రెస్టారెంట్లకు అనుబంధంగా ఉన్న బార్‌లను కూడా నిర్దేశిత సమయాల్లో మూసివేయాలని పోలీస్‌ అధికారులు ఉత్తర్వులు జారీ చేశారు. సైబరాబాద్‌ కమిషనరేట్‌ పరిధిలో కూకట్‌పల్లి, అల్లాపూర్‌, రాయదుర్గం, జీడిమెట్ల, మేడ్చల్‌, చందానగర్‌ పోలీస్‌ స్టేషన్ల పరిధిలోని మద్యం దుకాణాలు, కల్లు దుకాణాలు, రెస్టారెంట్లకు అనుబంధంగా ఉన్న బార్‌లను ఆదివారం ఉదయం 10 గంటల నుంచి రాత్రి 10 గంటల వరకు మూసివేయాలని పోలీస్‌ కమిషనర్‌ ఆదేశించారు. అయితే స్టార్‌ హోటళ్లు, నమోదిత క్లబ్బుల్లోని బార్‌లకు ఈ ఆంక్షల నుంచి మినహాయింపు ఇచ్చారు. ఆయా ప్రాంతాల్లో బోనాల వేడుకలు జరిగే సమయంలో జనసమ్మర్థం, రాకపోకలు, భద్రతా పరిస్థితులను దృష్టిలో ఉంచుకుని మద్యం విక్రయాలను తాత్కాలికంగా నిలిపివేస్తున్నారు.
హైదరాబాద్‌ నగర పోలీస్‌ కమిషనర్‌ వి.సి. సజ్జనార్‌ జారీ చేసిన ఉత్తర్వుల ప్రకారం రాజేంద్రనగర్‌, గోల్కొండ జోన్లలో స్టార్‌ హోటళ్లు, నమోదిత క్లబ్బుల్లోని బార్‌లకు మినహాయింపు ఉంటుంది. మిగిలిన అన్ని కల్లు, మద్యం దుకాణాలు, రెస్టారెంట్లకు అనుబంధంగా ఉన్న బార్‌లను ఆగస్టు 9 ఉదయం 10 గంటల నుంచి ఆగస్టు 10 ఉదయం 10 గంటల వరకు మూసివేయాల్సి ఉంటుంది. చార్మినార్‌ జోన్‌లో మాత్రం రెండ్రోజులు దుకాణాలు బంద్ కానున్నాయి. ఈ ప్రాంతంలో ఆగస్టు 9 ఉదయం 10 గంటల నుంచి ఆగస్టు 11 ఉదయం 10 గంటల వరకు మద్యం దుకాణాలు, సంబంధిత బార్‌లు మూసివేయాలని ఆదేశించారు. బోనాల సందర్భంగా చార్మినార్‌ పరిసర ప్రాంతాల్లో భారీగా భక్తులు, ప్రజలు తరలివచ్చే అవకాశం ఉండటంతో పోలీసులు ప్రత్యేక భద్రతా చర్యలు చేపట్టారు.
ఫ్యూచర్‌ సిటీ పోలీస్‌ కమిషనరేట్‌ పరిధిలోనూ మద్యం విక్రయాలపై ఆంక్షలు విధించారు. పోలీస్‌ కమిషనర్‌ తరుణ్‌ జోషి జారీ చేసిన ఉత్తర్వుల ప్రకారం ఆగస్టు 9 ఉదయం 10 గంటల నుంచి మరుసటి రోజు ఉదయం 6 గంటల వరకు కమిషనరేట్‌ పరిధిలోని మద్యం దుకాణాలు మూసివేయాలి. బోనాల ఉత్సవాల సందర్భంగా శాంతిభద్రతలను కాపాడటం, ఎలాంటి అవాంఛనీయ ఘటనలు చోటుచేసుకోకుండా ముందస్తు చర్యలు తీసుకోవడంలో భాగంగానే ఈ నిర్ణయం తీసుకున్నట్లు పోలీసులు తెలిపారు. పండుగ సందర్భంగా భారీగా ప్రజలు, భక్తులు రోడ్లపైకి వచ్చే అవకాశం ఉండటంతో పోలీస్‌ యంత్రాంగం ప్రత్యేక నిఘా ఏర్పాటు చేయనుంది. పండుగ సమయంలో ప్రజలు నిబంధనలు పాటించాలని, పోలీసులకు సహకరించాలని అధికారులు సూచిస్తున్నారు. మద్యం విక్రయాలపై విధించిన ఆంక్షలు ఆయా ప్రాంతాలకు, ఉత్తర్వుల్లో పేర్కొన్న సమయాలకు మాత్రమే వర్తిస్తాయని స్పష్టం చేశారు.