తెలంగాణలోని అన్ని ప్రైవేటు పాఠశాలలు 2026-27 విద్యా సంవత్సరంలో వసూలు చేస్తున్న ఫీజుల వివరాలను తరగతుల వారీగా పాఠశాల విద్యాశాఖ వెబ్‌సైట్‌లో అప్‌లోడ్‌ చేయాలని డైరెక్టర్‌ నవీన్‌ నికోలస్‌ ఆదేశించారు. గవర్నింగ్‌ బాడీ సభ్యుల సంతకాలతో ఫీజు నిర్ణయానికి సంబంధించిన పత్రాలను కూడా అప్‌లోడ్‌ చేయాలి. వివరాలు సమర్పించని పాఠశాలలకు షోకాజ్‌ నోటీసులు ఇవ్వాలని ఆర్‌జేడీలు, డీఈఓలను ఆదేశించారు. అయితే పలు ఆదేశాలకు తుది గడువు లేకపోవడం అమలుపై ప్రభావం చూపుతోందనే అభిప్రాయాలు వ్యక్తమవుతున్నాయి.
రాష్ట్రంలోని అన్ని ప్రైవేటు పాఠశాలలు ప్రస్తుత విద్యా సంవత్సరం (2026-27) విద్యార్థుల నుంచి వసూలు చేస్తున్న ఫీజుల వివరాలను తరగతుల వారీగా ప్రభుత్వ వెబ్‌సైట్‌లో అందుబాటులో ఉంచాలని పాఠశాల విద్యాశాఖ ఆదేశించింది. ఈ మేరకు పాఠశాల విద్యాశాఖ డైరెక్టర్‌ నవీన్‌ నికోలస్‌ శుక్రవారం ఉత్తర్వులు జారీ చేశారు. ఇప్పటివరకు ఆయా పాఠశాలల సొంత వెబ్‌సైట్లలో ఫీజుల వివరాలను ఉంచాలని ఆదేశించగా.. తాజాగా తెలంగాణ స్కూల్ ఎడ్యుకేషన్‌ వెబ్‌సైట్‌లోనే వివరాలను అప్‌లోడ్‌ చేయాలని స్పష్టం చేశారు. ఫీజుల వివరాలను ప్రజలకు అందుబాటులో ఉంచేందుకు పాఠశాల విద్యాశాఖ వెబ్‌సైట్‌లో ప్రత్యేక సదుపాయాన్ని ఏర్పాటు చేసినట్లు అధికారులు తెలిపారు. పాఠశాల యాజమాన్యాలు ఈ అవకాశాన్ని వినియోగించుకుని 2026-27 విద్యా సంవత్సరానికి సంబంధించి ప్రతి తరగతికి నిర్ణయించిన ఫీజుల వివరాలను అప్‌లోడ్‌ చేయాల్సి ఉంటుంది.
తరగతుల వారీగా ఫీజులనుఎలా నిర్ణయించారో తెలియజేసే సంబంధిత పత్రాలను కూడా అప్‌లోడ్‌ చేయాలని విద్యాశాఖ ఆదేశించింది. పాఠశాల పాలకమండలి సభ్యుల సంతకాలతో ఉన్న పత్రాలనే సమర్పించాలని స్పష్టం చేసింది. కేవలం ఫీజు మొత్తాలను మాత్రమే కాకుండా.. ఆ ఫీజు నిర్ణయానికి సంబంధించిన ఆధారాలను కూడా అందుబాటులో ఉంచడం ద్వారా ప్రక్రియలో పారదర్శకత పెంచాలని శాఖ భావిస్తోంది. ప్రైవేటు పాఠశాలలు ఫీజుల వివరాలను ప్రభుత్వ పోర్టల్‌లో అప్‌లోడ్‌ చేశాయా లేదా అన్నదానిపై పర్యవేక్షణ చేపట్టాలని ప్రాంతీయ సంయుక్త సంచాలకులు, జిల్లా విద్యాశాఖ అధికారులకు ఆదేశాలు జారీ చేశారు. నిర్ణీత వివరాలను అప్‌లోడ్‌ చేయని పాఠశాలలకు షోకాజ్‌ నోటీసులు జారీ చేయాలని స్పష్టం చేశారు.
అయితే పాఠశాల విద్యాశాఖ జారీ చేస్తున్న పలు ఆదేశాల్లో తుది గడువు లేకపోవడం చర్చనీయాంశంగా మారింది. గడువు నిర్దేశించకపోవడంతో కొన్ని ఆదేశాలను అధికారులు, స్కూల్ ప్రతినిధులు తీవ్రంగా పరిగణించడం లేదనే అభిప్రాయాలు వ్యక్తమవుతున్నాయి. ఫీజుల వివరాల అప్‌లోడ్‌కు కూడా స్పష్టమైన చివరి తేదీని ప్రకటించకపోవడం ఇదే తరహాలో ఉందని విద్యాశాఖ వర్గాల్లో చర్చ జరుగుతోంది. ఇదే సమయంలో 2024-25, 2025-26 విద్యా సంవత్సరాలకు సంబంధించిన పాఠశాలల ఆదాయ, వ్యయాల ఆడిట్‌ నివేదికలను సమర్పించాలని గత నెలలో విద్యాశాఖ ఆదేశాలు జారీ చేసింది. అయితే ఇప్పటివరకు ఆ నివేదికలను సమర్పించిన పాఠశాలల సంఖ్య నామమాత్రంగానే ఉన్నట్లు తెలుస్తోంది. ఆదేశాలను అమలు చేయడంలో జాప్యం జరుగుతున్నప్పటికీ.. తుది గడువు లేకపోవడం వల్ల చర్యలు తీసుకోవడంలోనూ కొంత ఆలస్యం జరుగుతోందనే అభిప్రాయాలు ఉన్నాయి.