D News: Jul 14: పశ్చిమ బెంగాల్: పశ్చిమ బెంగాల్లోని మేదినీపూర్ జిల్లాలో ఒకటో తరగతి చదువుతున్న ఆరేళ్ల చిన్నారిపై పాఠశాల ఆవరణలో లైంగిక దాడి జరిగిన ఘటన తీవ్ర కలకలం రేపింది. ఈ ఘటనలో పాఠశాల బాయ్స్ టాయిలెట్ అటెండెంట్పై ఆరోపణలు వచ్చాయి. ఘటనను కప్పిపుచ్చేందుకు పాఠశాల యాజమాన్యం ప్రయత్నించిందన్న ఆరోపణలతో స్థానికంగా ఆగ్రహం వ్యక్తమవుతోంది.
బాధిత కుటుంబ సభ్యుల కథనం ప్రకారం, జూలై 10న చిన్నారి ఎప్పటిలాగే పాఠశాలకు వెళ్లింది. పాఠశాల ముగిసిన అనంతరం ఇంటికి తీసుకువచ్చిన తల్లికి చిన్నారి తీవ్ర భయాందోళనకు గురైనట్లు కనిపించింది. అనంతరం జరిగిన విషయాన్ని తల్లిదండ్రులకు వివరించినట్లు కుటుంబ సభ్యులు తెలిపారు.
చిన్నారి తెలిపిన వివరాల ప్రకారం, తాను టాయిలెట్కు వెళ్లిన సమయంలో బాయ్స్ టాయిలెట్ అటెండెంట్ తలుపు మూసి తనపై లైంగిక దాడికి పాల్పడ్డాడని ఆరోపించింది. ఇదే సమయంలో మరో వ్యక్తి బయట నుంచి తలుపు తట్టడంతో నిందితుడు అక్కడి నుంచి తప్పుకున్నాడని కుటుంబ సభ్యులు పేర్కొన్నారు.
ఈ ఘటనపై తల్లిదండ్రులు వెంటనే పాఠశాల యాజమాన్యాన్ని ప్రశ్నించారు. అయితే, పాఠశాల ప్రతిష్ఠ దెబ్బతింటుందని చెబుతూ పోలీసులకు ఫిర్యాదు చేయవద్దని ప్రిన్సిపాల్ సూచించినట్లు వారు ఆరోపించారు. నిందితుడిని సమర్థించే ప్రయత్నం కూడా జరిగిందని కుటుంబ సభ్యులు తెలిపారు.
పాఠశాల యాజమాన్యం వ్యవహారంపై ఇతర విద్యార్థుల తల్లిదండ్రులు కూడా తీవ్ర ఆగ్రహం వ్యక్తం చేశారు. స్కూల్ ఎదుట పెద్ద ఎత్తున నిరసన చేపట్టడంతో ఉద్రిక్త పరిస్థితులు నెలకొన్నాయి. పరిస్థితిని అదుపులోకి తీసుకురావడానికి పోలీసులు అక్కడికి చేరుకుని చర్యలు చేపట్టారు.