DNews: Jun 24: తెలంగాణ ముఖ్యమంత్రి రేవంత్ రెడ్డి మాట్లాడుతూ, SIR చాలా తీవ్రమైన అంశమని అన్నారు. ఈ విషయంలో మంత్రులు, ఎమ్మెల్యేలు, ఎంపీలు, నియోజకవర్గ ఇన్చార్జ్లు మరింత అప్రమత్తంగా ఉండాలని ఆయన ఆదేశించారు. SIR విషయంలో కొందరు నాయకులు అత్యంత నిర్లక్ష్యంగా వ్యవహరిస్తున్నారని, పార్టీ నష్టాల్లో కూరుకుపోతుంటే చూస్తూ ఊరుకోవడంలో అర్థం లేదని సీఎం తీవ్ర ఆగ్రహం వ్యక్తం చేశారు. జిల్లాల్లో నిర్వహించిన SIR అవగాహన సదస్సులపై తన వద్ద పూర్తి నివేదిక ఉందని ఆయన వెల్లడించారు. SIR గురించి ప్రజల్లో మరింత అవగాహన కల్పించేందుకు కాంగ్రెస్ పార్టీ తరఫున మరిన్ని సదస్సులు నిర్వహించాలని, ఈ విషయంలో ఇన్చార్జ్ మంత్రులు మరింత బాధ్యతాయుతంగా వ్యవహరించాలని ఆయన స్పష్టం చేశారు. SIR పై సరైన అవగాహన లేకపోతే క్షేత్రస్థాయిలో పేదలకు పెద్ద ఎత్తున అన్యాయం జరుగుతుందని ఆయన ఆందోళన వ్యక్తం చేశారు. పేదల ఓట్లు పోతే వారి ఆధార్ కార్డులు, రేషన్ కార్డులు కూడా కోల్పోయే ప్రమాదం ఉందని, పేదలకు ఎలాంటి హాని జరగకూడదని ఆయన ముగించారు. ప్రతిఒక్కరూ పార్టీ ఆదేశాలను కచ్చితంగా పాటించాలని సీఎం రేవంత్ రెడ్డి స్పష్టం చేశారు. SIR విషయంలో పార్టీ నియమాలను పాటించని వారిని గుర్తించి, వారి స్థానంలో వెంటనే మరొకరిని ఇన్చార్జ్గా నియమిస్తామని ఆయన హెచ్చరించారు. పని చేయకపోవడం వల్ల పార్టీకి నష్టం జరిగితే తాను చూస్తూ ఊరుకోనని, ఈ విషయంలో నిర్లక్ష్యంగా వ్యవహరించేవారిని క్షమించబోనని ఆయన అన్నారు. ఈ విషయంలో నాయకులకు కేవలం 10 రోజుల సమయం ఇస్తున్నానని, ఈ సమయంలోగా మార్పు రాకపోతే కఠిన చర్యలు తీసుకుంటామని ఆయన స్పష్టం చేశారు