DNews: Mar 06: హైదరాబాద్లో శిల్పకళా వేదికలో జరిగిన మాదిగ ఉద్యోగుల సమన్వయ కమిటీ సమావేశంలో తెలంగాణ ముఖ్యమంత్రి రేవంత్ రెడ్డి, వైద్య ఆరోగ్యశాఖ మంత్రి దామోదర రాజనర్సింహ ప్రధాన అతిథులుగా పాల్గొన్నారు. ఈ సందర్భంగా ముఖ్యమంత్రి రేవంత్ రెడ్డి మాట్లాడుతూ ప్రజా సమస్యలను నిజాయితీతో పరిష్కరిస్తున్నామని, ప్రజా పరిపాలనలో అందరూ సంతోషంగా ఉన్నారని తెలిపారు. ఇది మీరు కోరుకున్న ప్రభుత్వం, మీరు కష్టపడి తీసుకొచ్చిన ప్రభుత్వం అని ఆయన గుర్తుచేశారు. మార్పు కోసం ప్రజా ప్రభుత్వాన్ని తీసుకొచ్చామని, పేదల పక్షపాత ప్రభుత్వమిదని ఆయన వివరించారు. గత పాలకులు అనేక అక్రమాలు చేశారని విమర్శిస్తూ, తాము మాటలతో లేదా ప్యాకేజీలతో గెలవలేదని, ప్రజల మద్దతుతోనే అధికారంలోకి వచ్చామని స్పష్టం చేశారు. మాదిగల వర్గీకరణ కోసం ఎన్నో పోరాటాలు జరిగాయని, ఈ పోరాటంలో అనేక మంది ప్రాణాలు కోల్పోయారని ఆయన విచారం వ్యక్తం చేశారు. వర్గీకరణ సమస్య 20 ఏళ్లుగా కొనసాగుతోందని, తాను ఎప్పటి నుంచీ మీ న్యాయమైన హక్కులకు మద్దతు ఇస్తున్నానని తెలిపారు. అసెంబ్లీలో వర్గీకరణకు సంబంధించిన తీర్మానం ఆమోదించి కేంద్రానికి పంపామని గుర్తుచేశారు. కర్ణుడు తన స్నేహితుడి కోసం చివరి శ్వాస వరకు నిలబడ్డాడని, తాము కూడా మాదిగల పక్షాన స్నేహసూత్రాలను పాటిస్తూ నిలబడ్డామని అన్నారు. వర్గీకరణ విషయంలో న్యాయం మాదిగల పక్షాన ఉందని, ఎంత ఒత్తిడి వచ్చినా తాము వెనుకడుగు వేయలేదని స్పష్టం చేశారు. సుప్రీంకోర్టు ఆదేశాల తర్వాత వర్గీకరణపై ప్రకటన చేసిన మొదటి రాష్ట్రం తెలంగాణ అని ఆయన గుర్తుచేశారు. తమ ప్రభుత్వానికి బ్రాండ్ అంబాసిడర్లు ప్రభుత్వ ఉద్యోగులేనని, ప్రజా ప్రభుత్వం వచ్చిన తర్వాతే అనేక సంక్షేమ పథకాలు ప్రవేశపెట్టామని తెలిపారు. ఉద్యోగులు అభివృద్ధి ప్రణాళికలో జాగ్రత్తగా ఉండాలని సూచించారు. తెలంగాణలో ఆర్థిక సమస్యలు ఉన్నాయని, పంపిణీ చేయడానికి ప్రభుత్వానికి భూములు లేవని, ఆర్థిక స్వేచ్ఛ పరిమితమని చెప్పారు. మాదిగలకు మెరుగైన విద్య అందించాలనే ఆలోచనతో తాను విద్యాశాఖను స్వయంగా తీసుకున్నానని, దానిని శుభ్రపరచడానికి కృషి చేస్తున్నానని ముఖ్యమంత్రి రేవంత్ రెడ్డి వివరించారు.