DNews: Mar 05: మెదక్ పట్టణంలో మహాత్మా గాంధీ విగ్రహాన్ని అవమానపరిచిన ఘటన తీవ్ర కలకలం రేపింది. రాందాస్ చౌరస్తాలో ఉన్న గాంధీ విగ్రహంపై గుర్తు తెలియని వ్యక్తులు రాత్రి సమయంలో ఆవు పేడ రాసి పారిపోయారు. బుధవారం ఉదయం స్థానికులు అక్కడికి చేరుకున్నప్పుడు ఈ దృశ్యం గమనించి వెంటనే మున్సిపల్ అధికారులు మరియు పోలీసులకు సమాచారం అందించారు. పోలీసులు సంఘటనా స్థలానికి చేరుకొని పరిస్థితిని సమీక్షించారు. అనంతరం మున్సిపల్ సిబ్బంది విగ్రహాన్ని శుభ్రం చేశారు. దేశానికి స్వాతంత్ర్యం సాధించిన మహాత్మా గాంధీ విగ్రహాన్ని అవమానపరిచినందుకు ప్రజలు తీవ్ర ఆగ్రహం వ్యక్తం చేస్తున్నారు. అన్ని పార్టీల నాయకులు కలిసి నిరసన కార్యక్రమం నిర్వహించి, బాధ్యులపై కఠిన చర్యలు తీసుకోవాలని డిమాండ్ చేశారు. ఈ ఘటనపై పోలీసులు కేసు నమోదు చేసి, పరిసర ప్రాంతాల్లోని సీసీటీవీ కెమెరాల ఫుటేజీని పరిశీలిస్తున్నారు. రాత్రి పూట పర్యవేక్షణ లేకపోవడం వల్ల ఇలాంటి సంఘటనలు జరుగుతున్నాయని ప్రజలు ఆందోళన వ్యక్తం చేస్తూ, ప్రధాన కూడళ్ల వద్ద భద్రతను పెంచాలని కోరుతున్నారు.