విజయ్ ఐటీ కేసు నేడే తీర్పు – దళపతి రాజకీయ భవిష్యత్తుపై దీని ప్రభావం ఎంత?

DET:FEB 06
కేసు నేపథ్యం మరియు పెనాల్టీ వివరాలు:
ఈ వివాదం 2015లో విజయ్ నటించిన పులి సినిమా సమయంలో జరిగిన ఐటీ దాడుల నుండి మొదలైంది.ఆ సమయంలో విజయ్‌కు సుమారు 21 కోట్ల రూపాయల రెమ్యూనరేషన్ అందినట్లు అందులో 4.93 కోట్లు నగదు రూపంలో ఉన్నట్లు అధికారులు గుర్తించారు. దీనిపై అదనపు ఆదాయంగా 15 కోట్ల రూపాయలను విజయ్ స్వయంగా అంగీకరించారు.అయితే ఈ వెల్లడి స్వచ్ఛందంగా జరగలేదని దాడుల వల్లనే బయటపడిందని పేర్కొంటూ ఐటీ శాఖ 1.5 కోట్ల రూపాయల జరిమానా విధించింది.దీనిని సవాలు చేస్తూ విజయ్ 2022లో హైకోర్టును ఆశ్రయించారు.

నేటి కోర్టు తీర్పు ప్రాధాన్యత:
జస్టిస్ సెంథిల్‌కుమార్ రామమూర్తి నేతృత్వంలోని ధర్మాసనం నేడు ఉదయం 10:30 గంటలకు ఈ తీర్పును వెలువరించనుంది. విజయ్ తరపు న్యాయవాదులు ఈ పెనాల్టీ నోటీసు కాలపరిమితి దాటిన తర్వాత ఇచ్చారని కాబట్టి ఇది చెల్లదని వాదిస్తున్నారు.ఒకవేళ తీర్పు విజయ్‌కు అనుకూలంగా వస్తే ఆయనకు పెద్ద ఊరట లభిస్తుంది.ఒకవేళ వ్యతిరేకంగా వస్తే జరిమానా చెల్లించడంతో పాటు రాజకీయంగా ప్రత్యర్థుల విమర్శలను ఎదుర్కోవాల్సి ఉంటుంది.

రాజకీయ ప్రయాణంపై దీని ప్రభావం:
విజయ్ ప్రస్తుతం తన చివరి సినిమా జన నాయగన్ పూర్తి చేసి 2026 తమిళనాడు అసెంబ్లీ ఎన్నికలపై దృష్టి సారించారు.ఆయన పార్టీ TVK ఇప్పటికే క్షేత్రస్థాయిలో బలోపేతం అవుతోంది.ఇటువంటి తరుణంలో పన్ను ఎగవేత లేదా పెనాల్టీ వంటి అంశాలు ఆయన ఇమేజ్‌పై ప్రభావం చూపే అవకాశం ఉంది.అవినీతి రహిత పాలన అనే నినాదంతో వస్తున్న విజయ్‌కు ఈ కోర్టు తీర్పు నైతిక బలాన్ని ఇవ్వడమో లేదా రాజకీయ అస్త్రంగా మారడమో జరుగుతుంది.

జన నాయగన్ సినిమా విడుదల చిక్కులు:
మరోవైపు విజయ్ నటించిన జన నాయగన్ సినిమా సెన్సార్ వివాదంలో చిక్కుకుంది.ఈ చిత్రానికి UA సర్టిఫికేట్ ఇవ్వాలన్న సింగిల్ జడ్జి ఆదేశాలను డివిజన్ బెంచ్ పక్కన పెట్టింది.దీనివల్ల సినిమా విడుదల మరింత ఆలస్యమయ్యేలా కనిపిస్తోంది.అటు సినిమా విడుదల సమస్యలు ఇటు ఐటీ కేసు తీర్పు.రెండూ ఒకే సమయంలో రావడం విజయ్ రాజకీయ మరియు సినీ వర్గాల్లో చర్చనీయాంశంగా మారింది.