మేడారం.. తిరుగువారం పండుగ అంటే ఏంటి..! ఆదివాసులు ఏం చేస్తారో తెలుసా…?

D Spiritual: Feb 5: తిరుగువారం పండుగ అంటే ఏమిటి?
మేడారం మహాజాతర ముగిసిన తర్వాత సరిగ్గా వారం రోజులకు మళ్లీ బుధవారం నిర్వహించే ప్రత్యేక వేడుకనే తిరుగువారం పండుగగా పిలుస్తారు. ఈ వేడుకను ఆదివాసి ఆచార సంప్రదాయాల ప్రకారం ఘనంగా నిర్వహిస్తారు. తిరుగువారం రోజున గద్దెల ప్రాంగణంతో పాటు సమ్మక్క–సారక్క గుడులు, పగిడిద్దరాజు, గోవిందరాజు ఆలయాలను శుద్ధి చేసి ప్రత్యేక పూజలు నిర్వహిస్తారు.

మండమెలిగే పండుగతో జాతర ఆరంభం
మేడారం మహాజాతరకు వారం రోజుల ముందు మండమెలిగే పండుగను నిర్వహిస్తారు. ఈ పండుగలో మేడారం చుట్టూ కట్టడి చేసి, కోడి పిల్లను ఊరి పొలిమేరల్లో వేలాడదీసి ఊరు కట్టు చేస్తారు. గ్రామం చుట్టూ తోరణాలు కట్టి దుష్టశక్తులు లోనికి రాకుండా ఆచారబద్ధంగా చర్యలు చేపడతారు. అనంతరం సమ్మక్క–సారక్క దేవాలయాలతో పాటు గద్దెల ప్రాంగణాన్ని శుభ్రపరిచి జాతరకు అంకురార్పణ చేస్తారు.

మహాజాతర నిర్వహణ విధానం
మండమెలిగే పండుగ ముగిసిన వారం రోజులకు బుధవారం మహాజాతర ప్రారంభమవుతుంది. ఆ రోజు సారలమ్మను, గురువారం సమ్మక్కను గద్దెలపైకి తీసుకొచ్చి ప్రతిష్ఠిస్తారు. నాలుగు రోజులపాటు జరిగే ఈ మహాజాతరలో లక్షలాది మంది భక్తులు వనదేవతలను దర్శించుకుని మొక్కులు చెల్లించుకోవడం ఆనవాయితీగా కొనసాగుతోంది.

తిరుగువారం పండుగ ప్రత్యేకత
జాతర ముగిసిన వారం రోజులకు వచ్చే బుధవారం తిరుగువారం పండుగ నిర్వహిస్తారు. ఈ రోజున ఆదివాసి పూజారులు తమ సంప్రదాయాల ప్రకారం పూజా సామాగ్రిని సమ్మక్క–సారక్క గుడిలోకి తీసుకువెళ్లి వనదేవతలకు ప్రత్యేక పూజలు చేస్తారు. దేవతలకు ప్రీతికరమైన నైవేద్యంగా జంతుబలి సమర్పిస్తారు. కట్టుబాట్ల ప్రకారం వడ్డెలు, ఇతర పూజా కార్యక్రమాలు నిర్వహించి రోజంతా జాగరణ చేస్తారు.

భక్తుల పాల్గొనడం
మహాజాతర సమయంలో దర్శనం వీలుకాని భక్తులు తిరుగువారం పండుగకు హాజరై వనదేవతలను దర్శించుకుంటారు. ఈసారి తిరుగువారం పండుగ సందర్భంగా సుమారు ఐదు లక్షల మంది భక్తులు మేడారానికి తరలివచ్చి సమ్మక్క–సారక్క దేవతలకు మొక్కులు చెల్లించుకున్నారు.