DNews: Jan 22: హైదరాబాద్లో యూట్యూబర్, సోషల్ మీడియా ఇన్ఫ్లూయెన్సర్ సిద్ధమౌని నరేందర్ను పంజాగుట్ట పోలీస్లు అరెస్ట్ చేశారు. సినీ నటి, బీజేపీ నాయకురాలు కరాటే కల్యాణిపై దాడి ఘటనకు సంబంధించి ఈ అరెస్టు జరిగింది. కరాటే కల్యాణి ముందుగా పంజాగుట్ట పోలీస్ స్టేషన్లో నరేందర్పై ఫిర్యాదు చేశారు. ఆయన తిరుమల తిరుపతి దేవస్థానం (TTD) పేరును దుర్వినియోగం చేస్తూ, లక్కీ డ్రా పేరుతో కోట్ల రూపాయలు వసూలు చేస్తున్నారని ఆమె ఆరోపించారు. రూ.399 చెల్లిస్తే ఫార్చ్యూనర్ కారు, ఐఫోన్ వంటి బహుమతులు గెలుచుకోవచ్చని తప్పుడు ప్రకటనలతో అమాయకులను మోసం చేస్తున్నారని తెలిపారు. ఈ క్రమంలో, అదిబాట్ల సమీపంలోని వండర్లా ప్రాంతంలో ఫార్చ్యూనర్ కారు లక్కీ డ్రా ప్రచారం చేస్తూ నరేందర్ను కరాటే కల్యాణి ప్రత్యక్షంగా పట్టుకున్నారు. ఆ సమయంలో ఆమెతో పాటు పంజాగుట్ట పోలీసులు కూడా ఉన్నారు. ఈ ఘటనలో 10 మంది కల్యాణిపై దాడి చేయడానికి ప్రయత్నించారు. ఆమెను భయపెట్టేలా చిన్ని పట్టుకునే ప్రయత్నం చేశారని సమాచారం. దీనిపై కల్యాణి పోలీసులకు ఫిర్యాదు చేయడంతో నరేందర్ను అరెస్ట్ చేశారు. ఆయనపై BNS సెక్షన్లు 74, 75, 79, 115(2), 132, 351(2), 352 కింద కేసు నమోదు చేశారు. అంతేకాక, నరేందర్ గతంలో మీర్పేట్ పోలీస్ స్టేషన్లో జరిగిన గొలుసు లాక్కోవడం (చైన్ స్నాచింగ్) కేసులో కూడా నిందితుడిగా ఉన్నారని తెలుస్తోంది. ప్రస్తుతం నరేందర్ను రిమాండ్కు పంపి, మోసం మరియు దాడి ఘటనపై పోలీసులు సమగ్ర విచారణ జరుపుతున్నారు.