DNews:10 Jan: బీఆర్ఎస్ వర్కింగ్ ప్రెసిడెంట్ కేటీఆర్కు అంతర్జాతీయ స్థాయిలో మరో అరుదైన గౌరవం దక్కింది. అమెరికాలోని ప్రతిష్టాత్మక హార్వర్డ్ యూనివర్సిటీ వేదికగా జరగనున్న 23వ ఇండియా కాన్ఫరెన్స్లో ప్రసంగించాల్సిందిగా ఆయనకు ఆహ్వానం అందింది.
అమెరికాలో విద్యార్థుల ఆధ్వర్యంలో నిర్వహించబడే అతిపెద్ద సదస్సులలో ఒకటైన ఈ ఇండియా కాన్ఫరెన్స్, ఫిబ్రవరి 14 మరియు 15 తేదీల్లో హార్వర్డ్ క్యాంపస్లో జరగనుంది. ఈ ఏడాది “ది ఇండియా వి ఇమాజిన్” (The India We Imagine) అనే థీమ్తో ఈ సదస్సును నిర్వహిస్తున్నారు. తెలంగాణను అంతర్జాతీయ స్థాయిలో టెక్నాలజీ మరియు ఇన్నోవేషన్ హబ్గా తీర్చిదిద్దడంలో, అలాగే హైదరాబాద్ ఐటీ ఎకోసిస్టమ్ను బలోపేతం చేయడంలో కేటీఆర్ పోషించిన కీలక పాత్రకు గుర్తింపుగా ఈ ఆహ్వానం పంపినట్లు నిర్వాహకులు పేర్కొన్నారు.
రెండు రోజుల పాటు జరిగే ఈ సదస్సులో భాగంగా, మొదటి రోజు హార్వర్డ్ కెన్నెడీ స్కూల్లో పాలన, అభివృద్ధిపై చర్చలు జరుగుతాయి. రెండో రోజు (ఫిబ్రవరి 15న) హార్వర్డ్ బిజినెస్ స్కూల్లో వ్యాపారం, గ్లోబల్ ఎకానమీ మరియు ఆంత్రప్రెన్యూర్షిప్ అంశాలపై చర్చలు జరగనుండగా, ఆ రోజున కేటీఆర్ ప్రసంగించనున్నారు. గతంలో ఈ వేదికపై నీతా అంబానీ, నితిన్ గడ్కరీ, అజీమ్ ప్రేమ్జీ మరియు జైరాం రమేష్ వంటి ప్రముఖులు ప్రసంగించారు. ఈ పర్యటన ద్వారా తెలంగాణలో పెట్టుబడుల అవకాశాలను మరియు రాష్ట్ర అభివృద్ధి నమూనాను కేటీఆర్ ప్రపంచ వేదికపై వివరించే అవకాశం ఉంది.