DNews:06 Jan: హైదరాబాద్‌లోని టోలిచౌకి ప్రాంతంలో నేడు (జనవరి 6, మంగళవారం) ఘోర రోడ్డు ప్రమాదం జరిగింది. అతివేగంగా వచ్చిన ఒక ప్రైవేట్ బస్సు జెప్టో (Zepto) డెలివరీ బాయ్‌ను ఢీకొట్టడంతో అతను అక్కడికక్కడే దుర్మరణం పాలయ్యాడు. మృతుడిని అభిషేక్‌గా గుర్తించారు.
ఈ ప్రమాదానికి సంబంధించిన వివరాల ప్రకారం, అభిషేక్ తన బైక్‌పై కస్టమర్‌కు ఆర్డర్ డెలివరీ చేసేందుకు వెళ్తుండగా టోలిచౌకి వద్ద బైక్ ఒక్కసారిగా స్కిడ్ అయి కింద పడిపోయాడు. సరిగ్గా అదే సమయంలో వెనుక నుంచి అతివేగంగా వస్తున్న ఒక ప్రైవేట్ బస్సు డ్రైవర్ గమనించకుండా అభిషేక్ తలపై నుండి బస్సును పోనిచ్చాడు. దీంతో తీవ్ర గాయాలైన అభిషేక్ సంఘటనా స్థలంలోనే ప్రాణాలు విడిచాడు.
ప్రమాదం జరిగిన తర్వాత ఆపకుండా వెళ్ళిపోయే ప్రయత్నం చేసిన బస్సు డ్రైవర్‌ను స్థానికులు వెంబడించి పట్టుకున్నారు. రోడ్డుపై మృతదేహం పడి ఉన్నా చాలా మంది వాహనదారులు ఆగకుండా వెళ్లిపోవడం పట్ల స్థానికులు విచారం వ్యక్తం చేశారు. సమాచారం అందుకున్న పోలీసులు వెంటనే ఘటనా స్థలానికి చేరుకుని మృతదేహాన్ని పోస్టుమార్టం నిమిత్తం ఆసుపత్రికి తరలించారు. నిమిషాల్లో డెలివరీ చేయాలనే కంపెనీల ఒత్తిడి మరియు డ్రైవర్ల నిర్లక్ష్యం డెలివరీ బాయ్స్ ప్రాణాల మీదకు తెస్తోందని ఈ ఘటనపై సర్వత్రా ఆవేదన వ్యక్తమవుతోంది.