DNews:22 Dec: హైదరాబాద్‌ రాయదుర్గ్‌ ప్రాంతంలో డ్రగ్స్ దందా వెలుగులోకి వచ్చింది. రాయదుర్గ్‌లోని కో–లివ్‌ గార్నెట్‌ కో–లివింగ్ పీజీ హాస్టల్‌లో డ్రగ్స్ సరఫరా జరుగుతోందన్న సమాచారంతో రాజేంద్రనగర్‌ ఎస్‌వోటీ పోలీసులు దాడులు నిర్వహించారు. ఈ దాడుల్లో MDMA డ్రగ్‌ను సరఫరా చేస్తున్న డ్రగ్‌ పెడ్లర్లతో పాటు ముగ్గురు వినియోగదారులను పోలీసులు అరెస్ట్ చేశారు.
పోలీసులు నిందితుల వద్ద నుంచి మొత్తం 12 గ్రాముల MDMA డ్రగ్‌, 7 గ్రాముల OG కుష్‌ గంజాయి, 6 మొబైల్‌ ఫోన్లను స్వాధీనం చేసుకున్నారు. కో–లివింగ్ మరియు పీజీ హాస్టళ్లను కేంద్రంగా చేసుకుని యువతను లక్ష్యంగా డ్రగ్స్ సరఫరా చేస్తున్నట్లు ప్రాథమిక విచారణలో తేలింది.
Hyderabad నగరంలో డ్రగ్స్ నెట్‌వర్క్‌ విస్తరిస్తున్న నేపథ్యంలో పోలీసులు అప్రమత్తమయ్యారు. ముఖ్యంగా ఐటీ ఉద్యోగులు, యువత ఎక్కువగా ఉండే కో–లివింగ్ హాస్టళ్లు, పీజీలను అడ్డాగా చేసుకుని డ్రగ్‌ పెడ్లర్లు కార్యకలాపాలు సాగిస్తున్నారని అధికారులు పేర్కొన్నారు.
ఈ కేసులో Hyderabad Police ఆధ్వర్యంలోని రాజేంద్రనగర్‌ ఎస్‌వోటీ ప్రత్యేకంగా దర్యాప్తు చేపట్టింది. డ్రగ్స్ సరఫరా వెనుక ఉన్న ప్రధాన నెట్‌వర్క్‌ను గుర్తించేందుకు విచారణను విస్తృతం చేసినట్లు పోలీసులు తెలిపారు. నగరంలో డ్రగ్స్‌పై జీరో టాలరెన్స్‌ విధానం కొనసాగుతుందని, నిందితులపై కఠిన చర్యలు తప్పవని హెచ్చరించారు.