D Spiritual: Dec 20: తిరుమల తిరుపతి దేవస్థానం (టీటీడీ) భక్తులకు అందించే సేవలను మరింత క్రమబద్ధంగా, సమర్థంగా నిర్వహించేందుకు వరుసగా కీలక నిర్ణయాలు తీసుకుంటోంది. అలిపిరిలో ఆధ్యాత్మిక టౌన్షిప్ ఏర్పాటు ప్రతిపాదనకు ఇటీవల టీటీడీ బోర్డు ఆమోదం లభించగా, అదే సమయంలో శ్రీవారి సేవకుల వ్యవస్థలోనూ విస్తృతమైన మార్పులు చేపడుతోంది.
భక్తులకు మర్యాదపూర్వకమైన, క్రమశిక్షణతో కూడిన సేవలు అందించాలనే లక్ష్యంతో టీటీడీ ‘మాస్టర్ ట్రైనర్’ విధానాన్ని ప్రారంభించింది. ఈ వినూత్న కార్యక్రమం ద్వారా తిరుమలకు వచ్చే భక్తులకు మెరుగైన సేవలు అందించాలనే దిశగా చర్యలు చేపట్టింది.
ఈ పథకం కింద మొత్తం 1,500 మంది మాస్టర్ ట్రైనర్లను సిద్ధం చేయాలని టీటీడీ నిర్ణయించింది. ఐఐఎం మరియు రాష్ట్ర ప్రణాళికా విభాగం సంయుక్తంగా ఈ శిక్షణ ప్రణాళికను రూపొందించాయి. మూడు నెలల క్రితం ఆన్లైన్ ద్వారా దరఖాస్తులు స్వీకరించగా, 2,000కు పైగా అప్లికేషన్లు వచ్చాయి. డిగ్రీ లేదా అంతకుమించిన విద్యార్హత కలిగి, 45 నుంచి 65 ఏళ్ల మధ్య వయస్సు ఉన్న వారిని ఎంపిక చేశారు.
ఎంపికైన మాస్టర్ ట్రైనర్లను 15 బ్యాచ్లుగా విభజించి, ఒక్కో బ్యాచ్కు సుమారు 150 మంది చొప్పున వారం రోజుల పాటు శిక్షణ అందిస్తున్నారు. ఈ శిక్షణను ఎస్వీయూ అధ్యాపకులు, మానవ వనరుల నిపుణులు, టీటీడీ విభాగాధిపతులు కలిసి నిర్వహిస్తున్నారు.
శిక్షణలో భాగంగా హిందూ సనాతన ధర్మం, తిరుమల చరిత్ర, భక్తులతో మర్యాదపూర్వకంగా వ్యవహరించాల్సిన విధానం వంటి అంశాలపై ప్రత్యేక అవగాహన కల్పిస్తున్నారు. అలాగే రద్దీ నియంత్రణ, అత్యవసర పరిస్థితుల్లో ప్రథమ చికిత్స, సీపీఆర్ వంటి అంశాలపై ప్రాయోగిక శిక్షణను కూడా అందిస్తున్నారు.
శిక్షణ సమయంలో వారానికి కనీసం రెండు రోజులు క్షేత్రస్థాయిలో అనుభవం పొందేలా ఏర్పాట్లు చేశారు. తిరుమలలో శిక్షణ పూర్తయిన తర్వాత, మాస్టర్ ట్రైనర్లు తమ తమ జిల్లాలకు వెళ్లి అక్కడి నుంచి శ్రీవారి సేవకు ఆన్లైన్లో నమోదు చేసుకున్న భక్తులకు ముందస్తు శిక్షణ అందిస్తారు.
భక్తులు తిరుమలలో పాటించాల్సిన నియమాలు, చేయవలసినవి మరియు చేయకూడని విషయాలపై అవగాహన కల్పించడం ఈ విధానంలోని ప్రధాన ఉద్దేశమని టీటీడీ స్పష్టం చేసింది. ఈ చర్యల ద్వారా భక్తుల సేవలు మరింత సుసంపన్నంగా, సాఫీగా సాగుతాయని అధికారులు ఆశాభావం వ్యక్తం చేస్తున్నారు.