DSports Dec18 2025:లక్నో: దక్షిణాఫ్రికాతో జరుగుతున్న నిర్ణయాత్మక టీ20 సిరీస్ మధ్యలో భారత జట్టుకు భారీ ఊహించని షాక్ తగిలింది. యువ ఓపెనర్ శుభ్‌మన్ గిల్ కాలి బొటనవేలి గాయం కారణంగా ఆఖరి మ్యాచ్‌లకు అందుబాటులో ఉండటం లేదని సమాచారం.
లక్నో వేదికగా జరగాల్సిన నాలుగో టీ20 మ్యాచ్‌కు ముందు ప్రాక్టీస్ సెషన్‌లో గిల్ నెట్స్‌లో తీవ్రంగా శ్రమిస్తుండగా, ఒక బంతి నేరుగా అతని కాలి బొటనవేలికి బలంగా తాకింది. దీంతో అతను నొప్పితో విలవిలలాడుతూ మైదానాన్ని వీడారు. బీసీసీఐ (BCCI) వైద్య బృందం పరిశీలించిన అనంతరం, అతనికి విశ్రాంతి అవసరమని సూచించింది.
కేవలం నాలుగో టీ20 మాత్రమే కాకుండా, అహ్మదాబాద్‌లో జరగనున్న ఆఖరి (ఐదో) టీ20కి కూడా గిల్ అందుబాటులో ఉండటం అనుమానంగానే ఉందని బోర్డు వర్గాలు వెల్లడించాయి.ఈ సిరీస్‌లో ఆడిన గత మూడు మ్యాచ్‌లలో గిల్ ఆశించిన స్థాయిలో రాణించలేకపోయారు (4, 0, 28 పరుగులు). ఈ క్రమంలో గాయం కావడం అతని కెరీర్‌పై ప్రభావం చూపే అవకాశం ఉంది.గిల్ దూరం కావడంతో ఓపెనర్‌గా సంజూ శాంసన్ తుది జట్టులోకి వచ్చే అవకాశం ఉంది. ఇప్పటికే ఫామ్‌లో ఉన్న శాంసన్, ఈ అవకాశాన్ని ఎలా వినియోగించుకుంటారో చూడాలి.మరోవైపు, లక్నోలో దట్టమైన పొగమంచు కారణంగా నాలుగో టీ20 మ్యాచ్ టాస్ కూడా ఆలస్యమైంది.