D Spiritual: Dec 12: తిరుమల వెళ్లే భక్తుల సంఖ్య రోజురోజుకు పెరుగుతున్న నేపథ్యంలో, ప్రభుత్వం, టీటీడీ (TTD), తుడా (TUDA) కలిసి సౌకర్యాల విస్తరణపై ప్రత్యేక దృష్టి పెట్టాయి. భక్తుల రద్దీ పెరుగుతున్న కొద్దీ రవాణా మరియు రోడ్లపై ఒత్తిడి పెరగడంతో, అలిపిరిని ప్రధాన కేంద్రంగా చేసుకుని ప్రత్యేక బేస్ క్యాంప్ ఏర్పాటు చేయాలని ప్రభుత్వం నిర్ణయించింది. ఈ ప్రాజెక్ట్‌కు సంబంధించిన ప్రణాళికలు కూడా ఇప్పటికే సిద్ధమవుతున్నాయి.
తిరుమల–తిరుపతి ట్రాఫిక్‌ను తగ్గించేందుకు 90 కిలోమీటర్ల ఔటర్ రింగ్ రోడ్ (ORR) నిర్మాణానికి TUDA ప్రత్యేక ప్రతిపాదనను సిద్ధం చేసింది. భక్తుల రాకపోకలకు ఎలాంటి అంతరాయం కలగకుండా రవాణా వ్యవస్థను మెరుగుపర్చే దిశగా ఈ ప్రాజెక్ట్ కీలక పాత్ర పోషించనుందని అధికారులు భావిస్తున్నారు. తిరుమల–తిరుపతి ప్రాంతాల్లో వాహన రద్దీ పెరుగుతుండటంతో భక్తులకు ఎదురవుతున్న ఇబ్బందులను తగ్గించేందుకు TUDA ఇప్పటికే అధికారిక సర్వేను ప్రారంభించింది.
ఈ రద్దీ సమస్యకు ORR రూపంలో ఒక పెద్ద పరిష్కారం లభించనుందని అధికారులు చెబుతున్నారు. ప్రతిపాదిత రింగ్ రోడ్ తిరుపతి గ్రామీణం, చంద్రగిరి, రామచంద్రాపురం, రేణిగుంట, వడమాలపేట మండలాలను కలుస్తూ సుమారు 90 కిలోమీటర్ల పరిధిలో నిర్మించనున్నారు. గతంలో మాజీ సీఎం చంద్రబాబు ప్రతిపాదించిన ‘వైకుంఠమాల’ ORR ప్రణాళికను మళ్లీ పరిశీలిస్తూ, ప్రభుత్వ భూములను అత్యధికంగా వినియోగించుకునే విధంగా తుడా అధికారులు ప్రణాళికలు రూపొందిస్తున్నారు.
ఈ రింగ్ రోడ్ పూర్తయితే తిరుమలకు వచ్చే వాహనాలను నగరంలోకి అనవసరంగా రానీయకుండా నేరుగా బయటకు మళ్లించే అవకాశం ఉంటుంది. దీంతో తిరుపతి నగరంలో ట్రాఫిక్ రద్దీ భారీగా తగ్గడమే కాకుండా, భవిష్యత్తు రవాణా అవసరాలను కూడా ఈ ప్రాజెక్ట్ సమర్థంగా నెరవేర్చుతుందని నిపుణులు అభిప్రాయపడుతున్నారు.