DNews: Dec 11: హైదరాబాద్లో GHMC డివిజన్ల పునర్విభజన ప్రజల్లో గందరగోళాన్ని సృష్టిస్తోంది. ఒక నియోజకవర్గానికి చెందిన కాలనీలు మరో నియోజకవర్గంలోని డివిజన్లలో కలిపేయడం వల్ల సమస్యలు తలెత్తుతున్నాయి. గతంలో GHMC అధికారులు చేసిన తప్పులను సరిచేయాలనే ఉద్దేశంతో ప్రస్తుత అధికారులు పునర్విభజన చేపట్టినా, మరింత సమస్యలు సృష్టించారని విమర్శలు వస్తున్నాయి. AIMIM నేతలు అక్బరుద్దీన్ ఓవైసీతో పాటు పలువురు ఎమ్మెల్యేలు చార్మినార్ జోన్లో డివిజన్ల పునర్విభజన సరిగా జరగలేదని GHMC కమిషనర్ ఆర్వీ కర్ణన్కు ఫిర్యాదు చేశారు. ప్రజాప్రతినిధులను సంప్రదించకుండా, వారి సూచనలు తీసుకోకుండా సరిహద్దులు నిర్ణయించారని వారు అభ్యంతరం వ్యక్తం చేశారు. గూగుల్ మ్యాప్ ఆధారంగా ఆన్లైన్లో సరిహద్దులు నిర్ణయిస్తే సమస్యలు వస్తాయని, ఫీల్డ్ స్థాయిలో పరిశీలిస్తేనే నిజమైన సరిహద్దులు తెలుస్తాయని ఒక నేత వ్యాఖ్యానించారు. ఇతర రాజకీయ పార్టీల నేతలు కూడా బాల్దియాలో వరుసగా ఫిర్యాదులు చేశారు. బాల్దియా ప్రధాన కార్యాలయం, JDS మరియు సర్కిల్ కార్యాలయాల్లో మొత్తం 40 ఫిర్యాదులు అందాయి. కమిషనర్ మాట్లాడుతూ, “రాజకీయ పార్టీలు, ప్రజాప్రతినిధులు సహా ఎవరైనా డివిజన్ల పునర్విభజనపై అభ్యంతరాలు, ఫిర్యాదులు చేయవచ్చు. ఈ నెల 17వ తేదీ వరకు గడువు ఇచ్చాం” అని తెలిపారు.
ఈ పునర్విభజనలో ఖైరతాబాద్ డివిజన్ పూర్తిగా ఖైరతాబాద్ నియోజకవర్గంలో ఉండేది. ఇప్పుడు గోషామహల్ నియోజకవర్గంలోని గన్ఫౌండ్రీ, ఆదర్శ్నగర్, లిబర్టీ క్రాస్రోడ్స్, బషీర్బాగ్ క్రాస్రోడ్స్, నిజాం క్లబ్, అరణ్యభవన్ ప్రాంతాలను ఖైరతాబాద్లో కలిపారు. బాలనగర్ డివిజన్ కూకట్పల్లి నియోజకవర్గంలో ఉండేది. ఇప్పుడు సేరిలింగంపల్లి, కుత్బుల్లాపూర్ నియోజకవర్గాల కాలనీలను బాలనగర్లో కలిపారు. ఫెరోజ్గూడ రైల్వే ట్రాక్కు ఆనుకుని ఉన్న కాలనీలను ఫతేనగర్ డివిజన్ నుండి మూసాపేట్ డివిజన్లో కలిపారు. పాత బోయిన్పల్లి రెండు భాగాలుగా విభజించి కొత్త డివిజన్ను హస్మత్పేట్గా పేరు పెట్టారు. అయితే మల్కాజ్గిరి నియోజకవర్గంలోని కొన్ని కాలనీలను కూకట్పల్లి నియోజకవర్గంలోని హస్మత్పేట్లో కలిపారు. ఇలాంటి గందరగోళం ఇతర డివిజన్లలో కూడా కనిపిస్తోంది. జనాభా పరంగా గరిష్టంగా 50,000, కనీసం 20,000 మంది ఉండేలా సరిహద్దులు గీసినట్లు అధికారులు తెలిపారు.