DNews: Dec 10: సిరిసిల్లలో బీఆర్ఎస్ వర్కింగ్ ప్రెసిడెంట్ కేటీఆర్ పర్యటన సందర్భంగా ముఖ్యమంత్రి రేవంత్రెడ్డి ప్రభుత్వంపై తీవ్ర విమర్శలు చేశారు. ఆటో డ్రైవర్ల కోసం నిర్వహించిన “ఆత్మీయ భరోసా” కార్యక్రమంలో పాల్గొన్న ఆయన, ప్రజలు మళ్లీ బీఆర్ఎస్ అధినేత కేసీఆర్ను ముఖ్యమంత్రిగా చూడాలని కోరుకుంటున్నారని, అందుకు అసెంబ్లీ ఎన్నికలు ఎప్పుడొస్తాయో ఎదురుచూస్తున్నారని అన్నారు. రేవంత్రెడ్డి దేవుళ్లపై ప్రమాణం చేసి ప్రజలను మోసం చేశారని ఆరోపిస్తూ, రెండు లక్షల రూపాయల రుణమాఫీ చేయాలంటే 50 వేల కోట్ల రూపాయలు అవసరమని, కానీ ఇప్పటివరకు కేవలం 25 శాతం ప్రజలకు మాత్రమే 12 వేల కోట్ల రూపాయలతో రుణమాఫీ చేశారని గుర్తుచేశారు. ఎన్నికల సమయంలో ఇచ్చిన రెండు లక్షల ఉద్యోగాల హామీపై ప్రశ్నిస్తూ, ఇప్పటివరకు ఇచ్చిన ఉద్యోగాలను మీరు నిజంగా ఇచ్చారా అని కేటీఆర్ సూటిగా ప్రశ్నించారు. రెండు సంవత్సరాలు అధికారంలో ఉన్నప్పటికీ 420 హామీలలో ఒక్కటీ అమలు చేయలేదని ఆయన ఆగ్రహం వ్యక్తం చేశారు. ఈ సందర్బంగా కేటీఆర్ బీమా బాండ్లను పంపిణీ చేశారు. 2023 చివర్లో జరిగిన తెలంగాణ అసెంబ్లీ ఎన్నికల్లో కాంగ్రెస్ పార్టీ విజయం సాధించి, రేవంత్రెడ్డి నేతృత్వంలో ప్రభుత్వం ఏర్పడింది. దశాబ్దం పాటు అధికారంలో ఉన్న బీఆర్ఎస్ పార్టీ ప్రతిపక్షంలోకి వెళ్లింది. ఎన్నికల సమయంలో కాంగ్రెస్ పార్టీ ప్రజలకు అనేక హామీలు ఇచ్చినప్పటికీ, వాటిని అమలు చేయడంలో విఫలమైందని బీఆర్ఎస్ పార్టీ నిరంతరం విమర్శలు చేస్తూ వస్తోంది.