DNews: Dec 08: హైదరాబాద్లోని అమెరికా కాన్సులేట్ జనరల్ కార్యాలయానికి వెళ్లే రహదారిని అమెరికా అధ్యక్షుడు డొనాల్డ్ ట్రంప్ పేరుతో “డొనాల్డ్ ట్రంప్ అవెన్యూ”గా పేరు మార్చాలని ప్రభుత్వం నిర్ణయించింది. ఈ నిర్ణయం ద్వారా తెలంగాణను అంతర్జాతీయ పెట్టుబడుల గమ్యస్థానంగా నిలపాలనే వ్యూహం ఉందని ప్రభుత్వ వర్గాలు వెల్లడించాయి. ముఖ్యమంత్రి కార్యాలయం ప్రకటనలో, ఈ ప్రతిపాదనపై త్వరలోనే కేంద్ర విదేశాంగ మంత్రిత్వ శాఖకు మరియు అమెరికా ఎంబసీకి లేఖ రాయనున్నట్లు తెలిపింది.
అంతేకాకుండా, హైదరాబాద్లోని కీలక రహదారులకు ప్రముఖులు, ప్రపంచ స్థాయి సంస్థల పేర్లు పెట్టాలని ప్రభుత్వం నిర్ణయించింది. నెహ్రూ ఔటర్ రింగ్ రోడ్ మరియు ప్రతిపాదిత రీజినల్ రింగ్ రోడ్ను కలిపే గ్రీన్ఫీల్డ్ రేడియల్ రోడ్కు పద్మభూషణ్ రతన్ టాటా పేరు ఇవ్వనున్నారు. అలాగే, ఫైనాన్షియల్ డిస్ట్రిక్ట్లో గూగుల్ నిర్మిస్తున్న భారీ క్యాంపస్ సమీపంలోని రహదారిని “గూగుల్ స్ట్రీట్”గా పేరు మార్చనున్నారు.
ఈ నిర్ణయాలపై రాష్ట్ర బీజేపీ నేత, కేంద్ర మంత్రి బండి సంజయ్ తీవ్రంగా విమర్శించారు. ఆయన అభిప్రాయం ప్రకారం, కాంగ్రెస్ ప్రభుత్వం పేర్లు మార్చాలనుకుంటే అవి చరిత్ర, వారసత్వాన్ని గుర్తు చేసేలా ఉండాలి కానీ ట్రెండింగ్లో ఉన్న వ్యక్తులు లేదా సంస్థల పేర్లు పెట్టడం సరైంది కాదని అన్నారు. అంతేకాకుండా, ముందుగా హైదరాబాద్ పేరు “భాగ్యనగర్”గా మార్చాలని ఆయన డిమాండ్ చేశారు.