నాచురల్ స్టార్ నానితో తమిళ దర్శకుడు ప్రేమ్ కుమార్ సినిమా ఆసక్తికర చర్చలు!

DET:DEC 02:
నాని నెక్స్ట్ సినిమా ఆ దర్శకుడితోనేనా?
నేచురల్ స్టార్ నాని వరుస సినిమాలతో దూసుకుపోతున్న విషయం తెలిసిందే. ప్రస్తుతం ఆయన శ్రీకాంత్ ఓదెల దర్శకత్వంలో తెరకెక్కుతున్న మాస్ ఎమోషనల్ డ్రామా ది ప్యారడైజ్ షూటింగ్‌లో బిజీగా ఉన్నారు. ఈ చిత్రం 2026 మొదటి భాగంలో విడుదల కానుంది. అయితే, ఈ సినిమా తర్వాత నాని చేయబోయే తదుపరి ప్రాజెక్ట్‌ల గురించి ఒక ఆసక్తికరమైన వార్త ఫిల్మ్ సర్కిల్స్‌లో చక్కర్లు కొడుతోంది.

తమిళ దర్శకుడు ప్రేమ్ కుమార్‌తో చర్చలు:
తాజా సమాచారం ప్రకారం తమిళంలో 96 మరియు మెయ్యళగన్ వంటి హృదయానికి హత్తుకునే అద్భుతమైన చిత్రాలను తీసిన దర్శకుడు ప్రేమ్ కుమార్ నానితో కలిసి సినిమా చేసేందుకు చర్చలు జరుపుతున్నారట. ఇటీవల ప్రేమ్ కుమార్ నానిని కలిసి ఒక కొత్త కాన్సెప్ట్‌ను వినిపించారని ఆ ఐడియా నానికి బాగా నచ్చడంతో ఆయన వెంటనే గ్రీన్ సిగ్నల్ ఇచ్చారని సినీ వర్గాలు చెబుతున్నాయి.

నాని ఫేవరెట్ డైరెక్టర్!
దర్శకుడు ప్రేమ్ కుమార్ సినిమాలకు నాని ఎంత పెద్ద ఫ్యాన్ అనేది ప్రత్యేకంగా చెప్పాల్సిన పనిలేదు. ముఖ్యంగా మెయ్యళగన్ సినిమా తనకు బాగా నచ్చిందని నాని పలు ఇంటర్వ్యూలలో కూడా తెలిపారు. ఈ నేపథ్యంలో వారిద్దరి కాంబినేషన్ సెట్ అయితే ప్రేక్షకులకు మరో ఫీల్‌గుడ్ ఎంటర్‌టైనర్ దక్కడం ఖాయమని అభిమానులు ఆశిస్తున్నారు.

అందుకే ఆలస్యం!
ప్రస్తుతానికి నాని ప్రేమ్ కుమార్ ఇద్దరికీ వరుసగా సినిమాలు లైన్‌లో ఉన్నాయి. ది ప్యారడైజ్ తర్వాత నాని, సుజీత్ దర్శకత్వంలో ఒక స్టైలిష్ యాక్షన్ డ్రామా చేయాల్సి ఉంది. అటు ప్రేమ్ కుమార్ కూడా విక్రమ్, ఫహద్ ఫాసిల్‌తో సినిమాలు చేయనున్నట్లు వార్తలు వస్తున్నాయి. ఈ కమిట్‌మెంట్స్ కారణంగా నాని-ప్రేమ్ కుమార్ కాంబినేషన్ సెట్స్ పైకి వెళ్లడానికి కొంచెం సమయం పట్టే అవకాశం ఉంది. అయితే, అన్నీ అనుకున్నట్లు జరిగితే ఏప్రిల్ 2026 నాటికి ఈ ప్రాజెక్ట్ మొదలయ్యే అవకాశం ఉందని తెలుస్తోంది. దీనిపై త్వరలోనే అధికారిక ప్రకటన వెలువడే అవకాశం ఉంది.