DSports 10 Nov :ప్రముఖ భారత మాజీ క్రికెటర్, చెన్నై సూపర్ కింగ్స్ (CSK) దిగ్గజం సురేశ్ రైనా, స్టార్ ఆల్రౌండర్ రవీంద్ర జడేజా ఐపీఎల్ 2026 సీజన్లో కూడా చెన్నై ఫ్రాంచైజీ తరఫున ఆడాలని బలంగా ఆకాంక్షించారు. ఐపీఎల్ 2026 మినీ వేలానికి ముందు, రాజస్థాన్ రాయల్స్ కెప్టెన్ సంజు శాంసన్కు బదులుగా జడేజాను ట్రేడ్ చేసుకునేందుకు చెన్నై సూపర్ కింగ్స్ ప్రయత్నిస్తున్నట్లు ఊహాగానాలు, వార్తా కథనాలు తీవ్రస్థాయిలో చక్కర్లు కొడుతున్న నేపథ్యంలో రైనా ఈ వ్యాఖ్యలు చేయడం ప్రాధాన్యత సంతరించుకుంది.
రైనా ఒక క్రికెట్ ఛానల్తో మాట్లాడుతూ, జడేజా చెన్నైకి అత్యంత ముఖ్యమైన ఆటగాడు అని, “సర్ రవీంద్ర జడేజా తప్పకుండా జట్టులో ఉండాలి” అని గట్టిగా నొక్కి చెప్పారు. “సంవత్సరాలుగా అతను జట్టు కోసం చాలా అద్భుతంగా రాణించాడు, కాబట్టి అతను కచ్చితంగా రిటైన్ చేసుకోవాల్సిన ఆటగాడు” అని రైనా స్పష్టం చేశారు. అయితే, ఇదే సమయంలో న్యూజిలాండ్ ఓపెనర్ డెవాన్ కాన్వే, భారత ఆటగాళ్లు విజయ్ శంకర్, దీపక్ హుడా వంటి కొందరు ఆటగాళ్లను విడుదల చేసి, జట్టులో మార్పులు తీసుకురావాలని రైనా CSK మేనేజ్మెంట్కు సలహా ఇచ్చారు. CSK మేనేజ్మెంట్ సైతం ఎంఎస్ ధోనితో పాటు రుతురాజ్ గైక్వాడ్ మరియు జడేజా వంటి కీలకమైన భారత ఆటగాళ్ల కోర్ను ఉంచుకోవాలని భావిస్తున్న నేపథ్యంలో, రైనా యొక్క ఈ వ్యాక్యాలు ట్రేడ్ రూమర్లకు వ్యతిరేకంగా జడేజాకు గట్టి మద్దతును తెలిపాయి. అన్ని ఫ్రాంచైజీలు తమ రిటెన్షన్ జాబితాను నవంబర్ 15 లోపు ప్రకటించాల్సి ఉంది